Аьр йыл сайын биз календарь бойынша физкультурник куьнин белгилеймиз. Йыл сайын да газетамыздынъ бетлеринде сол куьнге рас барып, тийислилердинъ тийислисин, оьзине тапшырылган ис аьрекетти намыслы толтыратаган аьдем акында язбага шалысамыз. Меним алдымда, ис борышларыма коьре, бу йыл да сол сорав турды. Оьзек те, ойланмага туьсти, авыл мектеблерининъ етекшилериннен сорастырмага, баскалай да физкультура дерисин беретаган окытувшылардынъ етимислери бар ма яде йок па, сондай соьзди де коьтермеге туьсти.
Ногай районымыздынъ орталыгы Терекли-Мектебтинъ кубыла бетиндеги авылы Карасудынъ физкультура сабагын беретаган окытувшысы Асанали Камбиевич Бекмурзаев бу куьн меним макаламнынъ бас келбети болды. Аьли ога буйырып туры. Ол ис йолдасларынынъ белгилевине коьре, оьз исине мукаят, яныплы эм ялынлы аьдем эм окытувшы.
Асанали Камбиевич мектебтен сонъ окытувшы болмага ниети болган ма, болмаган ма, бизге белгили тувыл. Ол баслап Махачкала каласында Дагестан патшалык авылхозяйстволык академиясын уьстинликли окып битирген. Оннан сонъ, Аьскер сырасында оьзининъ эр борышын да толтырып келди. Мине басланды авыл еринде кызыклы яшав оьмири. Оьзининъ тувган-оьскен авылынынъ В.И. Ленин атындагы оьсимлик бригадасынынъ бригадири болып ис аьрекетин баслайды. Ол оьз янына якын болган, суьйикли кесписи бойынша ис орынында коьп куллык этпеди. Уьш йыл узагында авыл хозяйствосын оьрлендируьвге багыслаганнан сонъ, элимизге баска строй келип, дуныя туьрленди. Авыл хозяйствосы бузылганга эсап болды (бу заманлар коьплердинъ эсинде болар).
– Элимизге кыйынлы заманлар келгенде, мен оьзим балаларды спорт яктан оьрлендирмеге токтастым. Баслапкы куьнлерде тыныш тувыл эди. Спорт пан каьрлемеге мырады бар балалар табылса да, меканымыз йок эди. Мен авыл яшавшыларынынъ уьйкен колтыклавы ман, коьмеги мен, баьри яктан да, мекан курдык. Бу куьнлерде соннан шыккан балалар тек район бойынша тувыл, республикалык кезегинде де спорт яктан етимислерин коьрсетедилер. Аьли баьри зат та ерлескен, бизде Терекли-Мектеб авылында аьрекетин бардыратаган Балалар-оьспир спорт мектебининъ филиалы болады. Тек бир етиспевлигимиз бар, баслап, биз спорттынъ бокс кеби мен каьрлейтаган эдик, аьли болса эркин куьреске шыкканмыз, неге десе боксты оьрлендируьвге амаллар йок.
ОБЖ сабагы бойынша да етимислеримиз бар. Меним сол сабак бойынша окувшыларым районымызда биринши орынларга коьп тийисли боладылар. Аьли уьшин бу ерде республикада савгалар алмасак та, шалысаякпыз. Бара тура сол етимиске де етисермиз, – дейди Асанали Камбиевич.
Оьз исин бажарып билген, балалардынъ келеектегисин ойлап туратаган окытувшыдынъ куьш салувы ман, сол баягы авылшылардынъ кол коьмеги мен аьли Карасуда бассейн да курылды. Соьйтип, балаларды суьйген юрек оны мектебке де аькелген, балалар ман ислей келе Хасавюрт каласындагы педагогикалык окув ошагын да окып битирген, кеспили окытувшы да болды.
Бизи мен хабарлавы бойынша Асанали Камбиевич оьзининъ окувшылары акында уьйкен суьйим мен соьйлейди. Ол тербиялайтаган эм эркин куьрес бойынша аьзирлейтаган агалы-инили Арслан ман Бекболат Темирбулатовларга уьйкен сеними барын билдиреди. Келеекте биз оларды Олимпиада чемпионлары деген атка етискенди эситермиз деген ниетимизди де эттик.
Асанали Бекмурзаев физкультура сабагы бойынша окытувшы, тренер. Булай караганда, айлак маьнели сабакты бермейди деп те айтпага болады. Теренине карасанъ, ол тек окытувшы болып калмайды, ол спортка суьйимди коьндируьвши, окувшылардынъ кызыксынувын коьтеруьвши де болмага борышлы. Спорт болган ерде, соны ман яслар аьвликкенде биз карувлы эм дени сав миллет акында айтпага боламыз. Ол тек халктынъ балаларына спортты суьйдирип калмайды, оьзининъ увыллары Заурбек пен Алимбекти де тек аьдемшилик яктан тувыл, спорт яктан да тербиялап келеди. Аьли увылы Заурбек медициналык колледжин окып битирди, сонынъ арасында Ставрополь крайынынъ бокс бойынша чемпионы деген атка да тийисли болган. Экинши увылы болса, бу йыл Ставрополь каласындагы медициналык йогары окув ошагынынъ студенти болады. Кишкей кызы Хадижа оьз уьстинликлери мен мектебте оьзининъ ата-анасын суьйинтип туры. Ол кайдай кеспи сайлаягын заман коьрсетер. Белки, ол атасынынъ йолын ызлап, окытувшы болар. Увыллары болса, анасы Заирадынъ ызын ызлаганлар. Ол Ногай орталык больницасынынъ хирургия боьлигининъ медсестрасы болып куллык этеди.
Асанали Камбиевичтинъ ис аьрекетин белсен бардыратаганы тек ис йолдасларына тувыл, авылдасларына да белгили. Ол сондай иси уьшин коьплеген Сый грамоталарга эм Дагестан Республикасынынъ Билимлендируьвининъ Отличниги деген атка тийисли болган.
Сондай окытувшыды кеспи байрамы ман кутлап, алдыда тек етимислерди йораймыз.
Г.Сагиндикова.
Суьвретте: Асанали Бекмурзаев (онънан экинши) оьз окувшылары ман
