Оьз яшавынынъ 50-ден артык йылларын бизим Кундару Карасаевна Сатырова окытувшылык аьрекетине багыслап келеди. Онынъ аты тек оьзи тувып-оьскен Карагас авыл яшавшылары арасында тувыл, савлай Ногай район яшавшыларына таныс.
Аьлиги заманларда Кундару Карасаевна (суьвретте оьз окувшылары ман) айтылган, оьз исин билген йогары категориялы окытувшы, IX окытувшылар съездининъ делегаты да болган, РСФСР-дынъ ярыкландырувынынъ отличниги, Дагестан Республикасынынъ ат казанган окытувшысы, Россия Федерациясынынъ Президент грантынынъ иеси… Бу баргылар окытувшыдынъ оьзининъ оьлшемсиз кыйыны ман казанылган. Окытувшыдынъ сансыз коьп Сый грамоталары ман разылык хатлары да сыйлы баргылар арасында бар. Ол 1970-нши йылда Хасавюрт каласындагы педагогикалык окув ошагын битирип, оьзи окыган Карагас авыл мектебинде вожатый болып ислеп баслайды. Коьп йыллар узагына ол авыл мектебининъ А.Матросов атындагы пионер дружинады етекшилейди. Сонъ баслангыш класслар окытувшысы болып куллык этеди.
Бизим балалар – Кундарув Карасаевнадынъ он биринши выпускы. Эсимизде, 2018-нши йылда балаларымыздынъ колыннан ыслап, биринши занъ ман деристинъ басланганы. Доьрт йыл, аккан сувдай болып кетти. Билим ягыннан да, тербиялав ягыннан да окытувшымыз балаларымызды коьп затка уьйретти. Аьлиги заманда бир балады оьстируьв бек кыйын. Класс етекшимиз аьр бир баладынъ эбин тавып, тийисли кепте тербиялады. Оьз окытувшысындай болып, балаларымыз эткен исине мукаят, акыллы, окувга шалыскыр саьбийлер. Онынъ озгаратаган аьр бир шарасы оьз алдына баска эм аьр бир окувшыдынъ, сонда ортакшылык эткен ата-аналардынъ, баьрисининъ эсинде калады.
Тек янъыларда, увыт айдынъ йырманшы куьнинде балаларымызга конакка Афган согысынынъ ветераны М.Мамутов эм шешен урысларынынъ катнасувшысы, Эрлик орденининъ иеси А.Адисов шакырылып, шара озгарды.
Йигитлик, оьз кишкей Аталыгын суьюв, эр борышын толтырув акында аьвлетлеримиз кинодан, китаптен тувыл, баьтир увылларымыздынъ, ердеслеримиздинъ хабарлавыннан терен билдилер.
2021-нши йыл онынъ эки окувшысы мектебти алтын медальге битирди. Бизим балаларга олар уьйкен коьрим, а окытувшыга – уьйкен куьез. Карагас авылынынъ К.Кидирниязов атындагы орта мектебининъ 4 «а» класстынъ ата-аналары сизге оьз разылыгымызды билдиремиз эм уьйкен савбол айтамыз!
Ата-аналар атыннан Зульфия Азизова эм Нурия Карайдарова, Карагас авылы.
