Кайсы урыстынъ да, согыстынъ да ызы ийгиликке аькелмейди. Аьр кайсысынынъ да аькелген йойымы болады. Сол затларды биз – хатынлар бек аьруьв анълаймыз. Эгер бу куьнлерде Россия Федерациясынынъ Президенти Владимир Путиннинъ буйырыгы ман Украина еринде спецоперациясы басланмаган болса, сонъ россиянлыларга яшавды тынышлыкта бардырмага кыйын болаяк эди. Ушыны ман да бизим элге айлак авыр кавыфлык тувдырмага болаяк эди.

Бу йылдынъ язлыгын биз тынышлыкта йолыктык деп айтып болмаймыз. Эл алдында эр борышларын толтыратаган офицерлер эм аьскершилер Украина еринде спецоперациясында катнасадылар, янъы шыккан нацистлер мен куьрес юритедилер. Олар уьшин анадынъ кыйналув сезимлерин суьвретлемеге бек кыйын. Сонда болатаган урысларда увыллары, эрлери оьлген, аталарын йойган кыскаяклылардынъ кайгысын айтпай да коямыз. Кайдай сезимлер хатынды бийлесе де, ишки дуныямыз бан анълаймыз, элди коршалав керек. Бизге тек намазларымызды кылып, увылларымызга эм аданасларымызга тилек тилеп, сав-эсен уьйге кайтканды куьтип турмага туьседи.
Йылдынъ язлык шагы ман ер янъырады, ярасыклык келеди, соны ман бирге сеним де тувады. Алдымызга янъы мыратлар, планлар саламыз. Бу кыйынлы заманларда аьр биринъизге коьнъилликти, беркликти, тынышлыкты, элимизге эмишликти сагынаман.
А.Агаспарова, «Ногайский район» МР-нынъ билимлендируьв боьлигининъ етекшиси.