Ызгы йылларда Ногай район орталыгы Терекли-Мектеб авылынынъ орам йолларына асфальт-бетон тоьсев куллыклары юритиледи.

Мунда «Меним Дагестаным – меним йолларым» деген патшалык программасын яшавга шыгарув ниетте Суюн Капаев атындагы орамынынъ йолына асфальт-бетон тоьселди. Алдынгы йылларда мундагы йоллардынъ осал сапатыннан тура «Ногай Эл» балалар бавы ювыгында аьр заман да коьликлердинъ топарласувы болатаган эди. Солай ок Ф.Капельгородский атындагы орам йолынынъ да бир кесегине асфальт салынган.
Буьгуьнлерде авылдынъ Кумлы атындагы орамы ман оьтетатаган йолды ярастырув куллыклары юритиледи. Бу орамнынъ йолы коьликлерге Кара-Су эм Кумлы авылларына баратаган тувра йолды ашады. Алдынгы заманларда мундагы яшавшылар гравий тоьселген йол ман оьтетаган автомашиналардынъ коьтерген шанъыннан коьзлерин ашып болмаганлар. Эндигиси бу орам йолына да асфальт тоьселеди.
Быйыл авылдынъ орам йолларын ярастырувга 13,1 миллионнан артык акша карыжы салынган.