Никитино деген авылы Саракташ районынынъ энъ бурынгы авылларынынъ бириси болады.

Уьстимиздеги йылда Никитино авылы 280 йыллык мерекесин белгиледи. Авыл тарихи акында макала йыйганда, биз Никитино авылына алтанаул ногайлары коьшкени акында билдируьвлерин таптык. Олар оьз уьйлерин ясаш татарларынынь касыннан салып, сол ерде олар ман авыл туьзгенлер. Сол заман авыл Никитин редуты деп аталган. Ногайдынъ аьвелгиси акында эстелик сакланады, буьгуьнлерде де районымыздынъ татар авылларынынъ асыл яшавшылары арасында «нугайлар», ногайлар деп айтадылар. Сары тамбыз айынынь 20-ншы куьнинде авыл мерекесин белгилев мен байланыста биз «Краеведлик калейдоскопы» деген хабарлав саьатин уйгынлап озгардык. Сол шарада Астраханьнен эм Башкортостан республикасыннан конаклар ортакшылык эттилер. Йолыгыс йогары коьнъилде эм авыл яшавшыларына уьйкен пайдалы болып оьтти. Кызыклы эм билимлендируьв амалы болган доклады ман Астрахань патшалык университетининъ тамада илми куллыкшысы, тарих илмилерининь кандидаты, доцентэтнолог, регионлар краеведлерининъ илмилер советининь председатели Виктор Викторин шыгып соьйледи. Этнограф, тарих магистри Линара Иргалиева авыл яшавшыларын астрахань ногайларынынъ миллет кийимлери эм аьдетлери мен таныстырды. Ол китапханамызга «Астрахань ногайларынынъ тарихи эм маданияты» деген китабин, белгили ногай ярыкландырувшысы, халк авызлама яратувшылыгын йыювшы эм тергевши А-Х.Ш.Джанибековтынъ «Соьз казнасы» деген асабалыгынынь биринши илми баспасын эм ногайша-орысша соьзлигин савгалады. Астрахань каласындагы патшалык университетининъ студенти Эдил Аджибаев йыйылганларды ногай йырларын усташа йырлавы эм домбыра саз алатында оьнерли ойнавы ман коьнъиллендирди. Башкортостаннан келген конаклар болса, оьз ата-бабаларынынъ акында тергевлери мен боьлистилер, курай (сыбызгы) саз алатында аьлемет анъларын ойнап эситтирдилер. (Никитино китапханасынынъ сайтыннан алынган)