Оьткен юмадынъ юма сонъгы куьниннен алып каты куьнине дейим Россия Федерациясынынъ баьри регионларында да сайлавлар оьттилер. Бир ерлерде тек Россия Федерациясынынъ Государстволык Думасына эм регионаллык Халк Йыйынына депутатлар сайландылар, баска ерлерде сол сырада регион басшысын сайлавлар да болып озды. Сол уьш куьн ишинде сайлавларда катнаспага шагы еткен, аьр бир аьдем, оьзининъ эли алдында гражданлык борышын толтырды. Сол борышын, бириншилердинъ бириси болып, Терекли-Мектеб авылынынъ яшавшысы Амина Зайнутдинова да толтырганлар санында.

– Мен оьзимнинъ патшалыгым алдында сайлавларга барувды уьйкен киели борышлардынъ бириси деп санайман, аьр бир акылы бар аьдем оьзининъ ойына, карасына коьре тавысын бермеге керек. Мен оьзимнинъ тавысымды яшаган элимде эмишлик, тынышлы яшав болсын деген ниетим мен бердим. Балаларымыз тек таза ава ман тыныс алып, тынышлы аспан астында яшаганын суьемиз, атайларымыз коьрген согысларды олар бир де коьрмесинлер.
Мен сакатлар куьбине балалыгымнан киремен. Бу куьн мен сайлавларга келип, алдынгыдай кыйынлыкка калмадым, ясыртын тувыл, бир неше йыллар артта сайлавларга барсам, сайлав участогына кируьв кыйынлыклар тувдыратаган эди. Аьли баьри сайлав участокларында да ден савлыгында кемшилиги бар аьдемлерге, сайлав участогына кируьв уьшин, баьри шартлар да туьзилгенлер, – дейди Амина Заурхан кызы.
Оьзек те, сайлавларга барув бизим борышымыз болады, неге десе сонда биз барып, оьзимиздинъ ойымызды коьрсетемиз эм янымызга якын кандидатка, партияга оьзимиздинъ тавысымызды бермеге боламыз.
Г.Сагиндикова.
Суьвретте: А.Зайнутдинова.