Ветеринар куллыкшысынынъ ис кесписининъ баскалыгы сол, эгер врач аьдемди эмлейтаган болса, ветеринар врачы савлай дуныяды эмлейди деп айтылады. Олар оьзлерининъ куьн сайынлык ис аьрекети мен тамак-азык продуктларынынъ кавыфсызлыгын тергеп, аьдемлерге эм айванларга зарар келтиретаган авырувлардынъ алдын шаладылар. Бу ис орынына аьдемлер тек юрек шакырувы ман келедилер, сол себептен ветеринария тармагында оьз исин суьймейтаган аьдемлер ислемейдилер.
Авылдасымыз Каирбек Сейдахмет увылы Рахмедов Ногай районынынъ ветеринария управлениесининъ коллективинде 30 йылдан артык заман куллык этеди. Ол мунда ветуправлениединъ ветеринар-санитарлык тергев лабораториясын етекшилейди.
Каирбек муннан 38 йылдынъ артында Ставропольдеги авыл хозяйство институтынынъ ветеринар врачларын аьзирлейтаган факультетин окып кутарган эм ол замандагы Ленин атындагы совхозында ветеринар врачы болып ис йолын баслаган. Коьп узакламай, район ветеринар управлениесине коьширилген. Сонъында оны 1985-нши йылда ВЛКСМ Ногай район комитетининъ уйгынлав боьлигине етекши этип беркиткенлер. Соннан бир кесек заманга ол ВЛКСМ Дагестан обкомындагы уйгынлав боьлигинде куллык этеди эм соннан район комсомол комитетине 2-нши секретарь болып келеди.
Комсомолда куллык эткен йыллары Каирбектинъ яшавында коьп йылы эстеликли оьзгерислер мен белгили. 1980-нши йылларда район хозяйстволары беркип баратаган заман кесеги эди. Сол йылларда район ВЛКСМ комитети яс-явка ман окувда, ис производствосында айырым куллык юритип турган. Район ериндеги окувшы эм исши ясларды согыс-патриот, Тувган Элине алал болмага, сонынъ оьрленуьвине оьз ис косымын этпеге тербиялаган. Комсомол ясларды яваплы авыл хозяйстволык ислеринде белсенли катнастырув уьшин мал кыславга, тоьл алув ислеринде малшыларга ярдамласувга, кой кыркымда, пишен-ем аьзирлевде, аслык йыювда, куьзде ер айдавга эм сондай коьп маьнели куллыкларга даьвлендирип, ерли-еринде комсомол-яслар бригадаларын уйгынламага ярдамласкан. Сол ислердинъ сырагысында коьп ерли яслар Социалист базласувдынъ енъуьвшилери болганлар, патшалык савгаларын казанганлар, коьплеген ВЛКСМ конференцияларында эм курылтайларында ортакшылык эткенлер.
Каирбек Рахмедовты 1989-ншы йыл ВЛКСМ Ногай район комитетининъ эсап беруьв-сайлавлар конференциясында конкурс негизинде район комсомолшылар комитетининъ 1-нши секретари этип сайлаганлар. Ол ога район яслары атыннан этилинген уьйкен сеним эди. Болса да 90-ншы йыллардынъ басындагы элдеги ямагат-политикалык оьзгерислерининъ сырагысында Совет Союзы бузылады эм баьри ерлердеги партия, комсомол организациялары ябыладылар. Сол себептен Каирбекке 1991-нши йылда оьз ис кесписи бойынша Ногай район ветеринар управлениесине кайтпага туьскен.
Аьлиги заманда ол мунда, йогарыда белгиленгенлей, район ветуправлениесининъ ветеринар-санитарлык тергев лабораториясын етекшилейди. Лаборатория тек ветеринар управлениесининъ де тувыл, сав районымыздынъ маьнели ис тармагы болып эсапланады.
– Лабораториядынъ бас аьрекети – ол яшавшыларды аьдемге эм малга ортак авырувлардан саклав, рынокка сатувга туьсетаган малшылык тамак-азык продуктларынынъ кавыфсызлыгын канагатлав, – дейди оьз куллыгы акында Каирбек Рахмедов.
Агропромышленность тармагында коьпйыллык кайратлы иси уьшин Каирбек Рахмедов РФ авыл хозяйство министри атыннан Разылык хаты ман, Ногай районнынъ 90 йыллыгы ман байланыста район аькимбасы Мухтарбий Аджековтынъ, район Ветеринар управлениесининъ етекшиси Кельдимурат Шамаровтынъ атыннан Сый грамоталары ман савгаланган. Солай ок ол комсомол куллыгында белсенли катнасканы уьшин 1986-ншы йылда ВЛКСМ Орталык Комитетининъ Сый грамотасын, 1987-нши йылда сол ок ВЛКСМ ЦК-нен Йогары сый белгисин де казанган.
Каирбек Рахмедов ян косагы, Терекли-Мектеб авылдынъ А.Джанибеков атындагы мектебининъ окытувшысы Нарбийке Кошманбет кызы ман коьримли татым аьелинде эки де кызларын йогары билимли эм тербиялы этип оьстирген.
М.Юнусов.
Суьвретте: Каирбек Рахмедов ис аьсеринде.
