Янъыларда Дагестан Республикасынынъ Роспотребнадзорынынъ етекшиси Николай Павловтынъ айырым категория гражданлары вакцинацияды оьтпеге кереклер деген токтасы шыккан. Сол вакцинацияды оьтпеге керек гражданлар санында маданият тармагынынъ куллыкшылары да бар. Сонынъ уьшин «Айланай» патшалык фольклор-этнографиялык ансамблининъ етекшиси Мурат Умар увылы Ваисов оьзиннен баслады эм ис йолдасларына коьрим коьрсетти.

– Мен вакцинацияды оьзим уьшин оьттим, йогарыдан буйырык бергени уьшин тувыл, неге десе бизим ден савлыгымыз – бизим оьзимиздинъ колларымызда. Меним аьелимде биринши болып, ясуьйкенлеримиз вакцинацияды оьттилер. Оларга сол бек керек деп, сав аьелимиз бен ойладык, неге десе бу авыр инфекциялы маразды оьзлеринде бар авырувлары ман енъуьв кыйын болаяк эди. Аьли биз оьз ата-анамыз уьшин де, оьзимиз уьшин де парахат.
Бизим куллыгымыз да сондай, халк пан тар катнас тутамыз, сонынъ уьшин де вакцинацияды оьтуьв бизге бек керекли. Алдыда Россиядынъ туьрли калаларына эм Бельгия ерине оьз оьнеримизди коьрсетпеге бармага ниетимиз бар эди. Аьли уьшин коронавируслы маразга карсы савытымыз йок, вакцинация болса, сол савытлардынъ бириси болады.
Элбетте, вакцинацияды биз оьз ыхтыярларымыз бан, эркимиз бен оьтпеге керек эдик. Биз республикамыздынъ Аькимбасынынъ кесек заманга куллыгын юритуьвши Сергей Меликовты, ДР-нынъ Роспотребнадзор етекшиси Николай Павловтынъ да кабыл этип алган токтасын дурыс коьремиз эм яклаймыз, ама баьриннен де вакцина бизим оьзимизге пайдалы болады, – дейди Мурат Ваисов.
Аьли уьшин «Айланай» хореографиялык ансамблининъ 10 куллыкшысы вакцинады алган, калганлары электронлы шеретке язылганлар.