«Шоьл тавысы» газетадынъ бетлеринде янъы коронавируслы инфекция ман авырыган аьдемлердинъ оьз ойлары баспаланып турады. Буьгуьн биз МГИМО алдышы илми куллыкшысы Ахмет Ярлыкаповтынъ Фейсбукте язган билдируьви мен боьлиспеге суьемиз. Онынъ айтувына коьре, коронавируслы мараз ога ямагат транспортта коьшкен.

– Маршруткага бир хатын минди, онынъ маскасы ярты кийилген, йоьткириги де куьшли эди, ол меним артыма эки сырадан сонъ олтырды. Терезелерди ашпага ярамайды, кырда куьз, сувык, сога коьре онынъ йоьткириги авада ушып юри эди. Соннан баскалай, ол токтамай телефон ман соьйлеп турды, арада бир йоьткирип алады. Метрога дейим мага маршрутка ман кырк такыйка юрмеге туьседи. Вирусты алмага мага амал уьйкен экенин баьринъиз де анълагандырсыз. Авырувлы ман бир ерде карсы келген баска, ама сондай аьдем мен коьп заман бир ерде олтырмага кашан да кавыфлы. Сол ерде мен оьзим де, баскалар да сол хатынга маскады кийинъиз деп айтпадык. Меним антителаларым вируска карсы турып болмадылар эм ол меним шаркыма кирди.
Вакцинация эткенимнинъ ийгилиги сол – мен больницага туьспедим, Аллага шуькир. Авырыган заманда кайтип вирус меним осал ерлеримди коьрсеткенин сездим. Эт кызувым 39 градуска дейим етти, юрегим де авырып баслады, парацетамол да коьмек этпейди. Вирустан дарман да йок. Аьелимиз бен авырдык, ийисти де, даьмди де билмей басладык. Эт кызув да 37 градус болды, сатурация 100 дейим келди. Тамакланувым бек ийги болды, авырыган заманда ашамаганымды аьли ашап басладым.
Мен сол куьнлерде мени коьтергишлеп, сорап турганларга савбол айтаман. Баьринъизге де ден савлык йорайман, оьзинъизди, ювыкларынъызды сакланъыз, – деп язады Ахмет Амин увылы Ярлыкапов социаллык тармакларында.
Ахмет Ярлыкаповка ден савлык эм янъы яратувшылык уьстинликлер йораймыз.