Танъла, 11-нши сентябрьден алып, элимиз, республикамыз эм Ногай районымыз бойынша ерли самоуправлениединъ ваькиллик органларына депутатларды сайлавлардынъ куьнлери басланады.

Эртеде токтастырылганга коьре, 11-нши эм 12-нши сентябрьде куьнибурын тавыслав куьнлери, 13-нши сентябрь – бас сайлавлар куьни деп белгиленген. Сондай тавыслав йорыгы быйыл янъы коронавирус юкпалы маразынынъ таралувы ман байланыста киргистилген.
Ногай районынынъ территориаллык сайлав комиссиясынынъ председатели Алимакка Ганиев билдиргенлей, баьриси район бойынша 21 сайлав участоклары эм сол шаклы участок комиссиялары бар деп эсапланады. Солардынъ 12-си билимлендируьв учреждениелерининъ, 7-си авыл маданият уьйлерининъ эм 2-ви авыл администрация меканларында орынласканлар. Баьриси Ногай районы бойынша 98 бир мандатлы сайлав округлары бар эм сол шаклы депутат мандатлары сайлавларда енъген депутатларга тапшырылаяк. Районда Кумлы, Кара-Сув, Эдиге авылларында 7-ер сайлав округлары, калганларында 11-ер округлардан белгиленген. Олай дегени, йогарыда белгиленген авыллардынъ аьр бирисинде 7-ер депутаттан, калганларында 11-ер депутаттан сайланаяк. Сол шаклы округлардан баьриси 230 кандидатлар сайлавларда катнаспага аьризе бергенлер, солардынъ 20-сы сонъында аьризелерин кайтарып алганлар.
Буьгуьнлерге баьри сайлав участоклары да сайлавларга аьзирлиги ягыннан тергелгенлер, табылган кемшиликлери акында тийисли авыл администрацияларына соларды тайдырув акында билдирилген.
Келеяткан тавыслав куьнлери де яздагы Россия Конституциясына туьрленислер киргистуьв уьшин тавыслав куьнлериндей болып йогары санитар-эпидемиялык кавыфсызлык аьллерин тутув негизинде оьткерилеек.
– Дагестан Республикасынынъ Оькимети янъы коронавирус маразынынъ яйылган шагында сайлавларда кавыфсызлыкты тутув ман байланыста участок сайлав комиссияларынынъ агзаларын коршаланув алатлары ман канагатлав ниетте баьри калалар эм районлар муниципаллык образованиелерине акша карыжлар шыгарган. Солар район администрациясы ман баьри авыл ерлериндеги участок сайлав комиссияларына еткерилгенлер, – деди Ногай район территориаллык сайлав комиссиясынынъ председатели Алимакка Ганиев. Бирер кандидатлар сайлавлар аьсеринде бузувлар болмасын уьшин сайлав участокларынынъ меканлары ишлеринде видеокамералар салмага керек деген соравды коьтергенлер. Бу соравды, Алимакка Ганиевтинъ айтувы ман, участок сайлав комиссиялары оьзлери ерли-еринде карар шыгарувы ман шешпеге боладылар.
– Аьлиги заманда кеште тавыслав заманы биткен сонъ, участок сайлав комиссиясынынъ агзалары бюллетеньлерди ящиклерден шыгарадылар эм сейф-дорбаларына ерлестиредилер. Соьйтип болып, соны баьрисининъ коьзинше ябадылар эм кырына комиссия агзалары эм тергевшилер колларын басадылар. Сейф-дорбады бирев де ашып болмайды, соны тек йыртып ашпага болады. Ол зат тавыслав заманы кутылган сонъ да бузувлар болмасын деген ниет пен этилинген, – деди район ТИК председатели.
Сыйлы авылдаслар! Сайлавлар куьнлеринде оьз авылларымыздагы участок сайлав комиссияларына барып, гражданлык борышымызды толтырайык: кандидатлар арасыннан тийисли дегенлерин, оьз халкы, районымыз, авыллары уьшин алдыдагы 5 йыл ишинде намыслы кепте куллык этееклерди сайлайык. Биз сайлаган депутатлар сонъында бизим авылларымыздагы, районымыздагы Депутатлар йыйынларын толыстыраяклар, район бактысы олардынъ колларына коьшеек. Болса да сиз де, аявлы ердеслер, бизим сайлавшылар, депутатлар куллыгыннан шетте калманъыз. Сайлавшылар советлерин туьзип, депутатларга туьз маслагатларынъызды беринъиз, олардынъ ислери артыннан тергев салынъыз, ислерин бажармайтаганларды кери кайтарынъыз, сол затка сизинъ толы ыхтыярларынъыз бар. Оьз бактынъыз уьшин белсенли болынъыз!
М.Ханов.