Яшав кайсы заманларда да бир еринде турмаган, йыл сайын, куьн сайын туьрленип келген. Оны ман бирге бизим школа, окытувшы эм окувшы да туьрленеди. Ама бир зат дайым да еринде калады – ол окытувшыдынъ куллыгынынъ бас маьнеси. Балаларга билим беруьв эм оларды тербиялав.

Мен оьз макаламды ис йолдасым Салимет Баймурза кызы Аджигельдиева акында айтпага суьемен.

Ол мине отыз йылдан артык оьзининъ яшавын суьйген кесписине багыслаган. Салимет Баймурза кызы Лукмановлардынъ аьелинде Ленинаул авылында тувган. Мектебти биткенлей ок, Махачкаладагы пединститутынынъ филология боьлигине туьседи. Оны тамамлап, тувган авыл мектебинде орыс тилиннен окытувшы болып куллык этеди.

Бир неше йыл ислей келип, ол Умар Аджигельдиев пен танысып, уьйкен аьел курады. Сонъ Салимет Баймурза кызы Калинин авыл мектебинде ислеп баслайды. Ол – оьз куллыгына бек мукаят аьдем. Ол аьдемшилиги, танълыгы, куллыксуьерлиги мен коллективте сый-абырай казанган. Оны окувшылары да бек сыйлайтаган эдилер. Салимет Баймурза кызы бир неше кере Сый грамоталарга, баргыларга тийисли болган. Ол бир неше йыл мектебте окув иси бойынша завуч куллыгын да юриткен. Ис йолдаслары ман ол тил бирлик тавып, коьнъили мен ислеп келген.

Аьли болса, ис йолдасымыз – тийисли тыншаювда. Тыншаювда болса да, мектебте тез-тез конакта болады. Онынъ окыткан окувшылары буьгуьнлерде туьрли тармакларда куллык этедилер. Оларга карап, окытувшы да бек куьезленеди.

Салимет Баймурза кызы Умар ман татым аьел курып, биргелесип доьрт кызларды асырап, асыл этип аягына салдылар. Буьгуьнлерде болса уныклары ман куьезленип келедилер.
Биз, ис йолдаслары, Салимет Баймурза кызын 60 йыллык сыйлы мерекеси мен ак юректен кутлаймыз. Ога берк ден савлык, узак оьмир, яшавында коьп ийгиликлер йораймыз.

Г. Янгазиева,
Калинин авыл мектебининъ окытувшысы.
Суьвретте: Салимет Аджигельдиева.