Кайратлы, исти суьйген, коьнъили дайым да коьтеринъки болган кыскаяклылар ман аьллескен аьдемлерге олардынъ куьши эм коьнъиллиги коьшетагандай болады, сондай хатынлар аьдемлерди оьзине тартадылар. Феруза Ханмурзаева оьзининъ сондай касиетлери мен коьп йыллардан бери таныйтаганларды сукландырып келеди. Оны болса Ногай район орталыгы Терекли-Мектебте танымаган аьдемди табув кыйын болар деп ойлайман.
Феруза Дильманбетовна Батыр-Мурза авылында тувган, Нариман авылында онынъ балалыгы озган. Онынъ атасы Дильманбет Уллы Аталык согысынынъ катнасувшысы болган. Ол коьп йыллар «Коктюбинский» авыл Советинде аьрекетлеген, хатыны да сонда кадрлар боьлигинде ислеген.
Мектебти окып тамамлап, Феруза Ханмурзаева Шелковскойдагы авыл хозяйстволык техникумда окыган. Ис аьрекетин Кизляр нефтебазасынынъ Нариман авылындагы АЗС-40 боьлигинде баслайды. Ога уьйкен наьсип буйырган анасы ман бирге ислемеге. Бизге кайсы заманларда да, кайсы ясымызда да ата-анадынъ маслагаты, коьтергишлеви керек болады, сога коьре олар ман бирге ислев, меним ойыма коьре, уллы наьсип. Феруза Ханмурзаева да бу куьнлерде, яшаган йылларынынъ йогарыннан карап, оьзининъ йигерлилигининъ, халк арасында сый-абырай казанувынынъ эм коьп йыллар халк пан бирге бажарымлы ислеп келуьвининъ себеби этип ата-анасынынъ ийги коьрим болувын санайды. Солай ок бу куьнлерде Феруза Ханмурзаева уьйкен разылык пан Джабраил Мунгишиевти (яткан ери еннетли болсын) эсине алады: «Сол йылларда ол совхоз директоры эди. Джабраил Мунгишиев Кизляр нефтебазасынынъ Наримандагы АЗС-40 боьлигин ашты эм мени сонда куллыкка алды. Мунда болса мен 20 йыл узагында иследим. Ис йолдасларым ман, бир аьелдей болып, бир-биримиз бен бек татым эдик, яхшылык- яманлыкта дайым табылдык. Оннан сонъ «Россети Северный Кавказ»-Дагэнергодынъ ПАО филиалында Ногай районынынъ электроярык пан пайдаланатаган аьдемлери мен эсап коьруьв операторы болып туьстим, соьйтип, мунда 25 йылдан бери ислеймен», – дейди Феруза Ханмурзаева.
Мунда ис аьрекетин толтырып турган мезгилинде, мен Феруза Дильманбетовнадан онынъ яшав эм ис йолы акында сорадым эм куллыкшылардынъ бир-бири мен аьллесуьвине, бу боьликти байырлап алган рахатлыкка эм бир-бирине сый этуьвге бек сукландым. Оьз коьзим мен де коьрдим эм сездим кайтип ис йолдаслары Феруза Дильманбетовнады оьрметлейтаганларын. Сонъ ясуьйкен куллыкшыга мунавдай соравымды бермей болмадым: «Аьдемлер мен ислев кыйын экени сыр тувыл. Кайтип сиз ол тыныш болмаган исти сол кадер заман уьстинликли юргистесиз?». Сол соравга Феруза Ханмурзаевадан мунавдай явап та алдым: «Аьдемшилик, тек сол мага ярдам болып келеди. Сен ийги болсанъ, сага да ийги боларлар. Аьдемшилик болмаса, кайдай йогары окув ошагында окысанъ да, кайдай билиминъ болса да, пайда йок».
Феруза Ханмурзаевага ийги иси уьшин ДР-нынъ Энергетика эм промышленность министерствосыннан Сый грамота, «МРСК Северный Кавказ» ПАО генеральный директоры Ю.Зайцевтен эм «Ногайский район» МР администрациясыннан Разылык хатлар тапшырылган. Онынъ суьврети Ногай районынынъ Сый тактасында да йыл узагына турган. Кыскаяклыдынъ исине уьйкен яваплылык пан карайтаганын онынъ ис йолдасы, коьп йыллар етекши исин юриткен Арсланбий Уразаев те белгилейди. Феруза Дильманбетовна оьз ис йолдасларынынъ ога эткен сыйына уьйкен разылык сагынады: «Мен мунда бас деп Арсланбий Уразаев пен, сонъ Суьйинбек Джумандыков пан, Шора Сариев пен, Адильхан Янмурзаев пен ислегенмен. Аьлиги етекшимиз – Амирбек Бекмуратов. Ис йолдасларыма мага сый эткенге, оькиметке меним исимди белгилегенине савбол айтаман. Меним йолымды, меним ясымды балаларыма эм ис йолдасларыма йорайман», – дейди Феруза Ханмурзаева.
Бу кыскаяклыдынъ соьзи тек куллыкшылары тувыл, кардаш-тувганлары сырасында да юреди. Оннан маслагатты оьзининъ аданаслары эм синълилери, кардашлары эм эрининъ кардашлары да сорайдылар. Ол зат бу хатыннынъ аьдемшилиги эм билими акында айтпай болмайды. Феруза Ханмурзаева оьзининъ эри Крымсолтан Алимусаевич пен (яткан ери ярык болсын) доьрт бала асырап оьстиргенлер. Балаларынынъ, уныкларынынъ эм немерелерининъ суьйимине эм куьезине куванып яшайды наьсипли ана, тетей эм эней. Олардынъ аьр бириси яшавда оьз орынын тапканлар, кайсысы да оьз суьйген исин толтырадылар. Айхай да, оларга тербия беруьвде бизим сыйлы Феруза-абайдынъ уьлиси бар.
Н. Эрежепова.
Суьвретте: Ф. Ханмурзаева.
