Быйыл язлыкта Савлайроссиялык «Справедливая Россия» политикалык партиясы «Патриоты России» эм «За Правду» деген политикалык партиялары ман косылысып, оьз атын туьрлендирген. Сонынъ акында партиядынъ курылтайында официаллы кепте билдирилген. Эндигиси бу партия «Социалистическая политическая партия «Справедливая Россия – Патриоты России – За правду» деп аталады. Онынъ председатели Сергей Миронов, сопредседательлери – Геннадий Семигин эм Захар Прилепин.

Партия быйыл 26-ншы июньде озгарган кезекли курылтайында сегизинши кере шакыртылаяк РФ Государстволык Думасына депутатларга кандидатлардынъ федераллык списогына оьз сырасыннан 307 кандидатын эм бир мандатлы сайлав округларына 223 кандидатларын айырганы акында билдирген.
Партиядынъ Дагестан регионаллык боьлигиннен келеяткан сайлавларга депутатларга кандидатлар этилинип 7 аьдем коьрсетилинген. Списоктынъ басында – РФ Государстволык Думасынынъ Миллетлер ислери бойынша комитетининъ председатели Валерий Газзаев, 2-нши болып списокта партиядынъ Дагестан регионаллык боьлигининъ советининъ председатели, ДР Халк Йыйынынынъ Председателининъ орынбасары Камил Давдиев белгиленген.
Камил Давдиев партиядынъ курылтайынынъ сырагылары бойынша РФ Государстволык Думасынынъ депутатларына кандидатлардынъ куьшли командасы айырылганын билдирген. Олардынъ аьр бирисининъ уьйкен политикалык сулыбы эм ямагат арасында тийисли сый-абырайы бар.