5-нши казан айы – Окытувшы куьни _______________
Бизим Куьнбатар авыл орта мектебинде ислейтаган ийги окытувшылар аз тувыл. «Окытувшылар байрамына ким акында язбага болады?» – деген соравыма мектеб директорынынъ куллыгын юритуьвши Тамара Сраждин кызы Бариева бир иркуьвсиз оьзининъ 40 ис йылын авыл мектебине багыслаган Марьяна Тойшы кызы Терекбаевады атады.
М.Терекбаева 1979-ншы йыл Дагестан патшалык университетининъ шет эллер тиллер факультетин кутарып келгенде, оны Батыр-Мурза авыл мектебине йибердилер. Болса да бактысы оны тувган Куьнбатарына, мине деген йигитининъ суьйимине явап эсабында кайтарды. Соннан бери ол М.Курманалиев атындагы авыл мектебинде баслап француз, сонъ англис тиллерининъ окытувшысы болып куллык этеди.
Йылдан-йылга оьз ис сулыбын оьстире келип, аьлиги заманда ол – абырайлы ясуьйкен окытувшы, яслардынъ насихатшысы болды. Кесписине алал, йогары билимли окытувшылардынъ бириси. Марьяна Тойшы кызы балалар ман оьзи арасында бир-бирисин анълав эм сыйлав йорыгы ман ийги катнаслар туьзип, окувшыларды да аьруьв ислер этпеге онълайды.
М.Терекбаева окытув аьрекетине яратувшылык пан янасатаган педагоглардан. Ол аьр бир окытувшыдынъ байыр эбине эм хаьсиет баскалыкларына айырым эс этеди. Балалардынъ туьрли яклардан оьрленуьви акында токтавсыз каьр шегеди, оларды яратувшылыкка онъламага, ийгиликке суьйимлик сезимин тувдырмага шалысады. Оьз окувшыларынынъ яшавын толы кепте кызыклы этуьв уьшин коьп кыйынын салады. Балалардынъ тербиясын, билимин, интеллектин оьстируьв мырадта класстан тыскы коьп шаралар уйгынлап озгарады. Соларда баьри окувшылар да ортакшылык этсе экен деп шалысады.
М.Терекбаевадынъ окытувшыга керек кылыклары: кеспи усталыгы, эрудициясы, бийик маданияты, аьдемшилиги, оьз ис йолдасларын, окувшыларын тынълап эм сыйлап, олардынъ эбин тавып билгенге, онынъ окувшыларынынъ билими 100 процентке, билим сапаты 64-70 процентлерге етиседи.
Ол тек уста окытувшы болып калмай, ийги етекши деп те саналады. Ети йылдан бери директордынъ тербиялав яктан орынбасары, бес йыл илми-методикалык яктан орынбасары болып ислеген, билими ийги талаплы балалар ман куллык этуьвге коьп куьшин берген. Ол затты сол йылларда мектеб окувшыларынынъ туьрли конкурсларда, олимпиадаларда алган Сый грамоталары, баргылары шайытлайды.
Марьяна Тойшы кызы мектебтинъ ямагат куллыгында да шолпа туьсип катнасады. Ол 17 йылдан бери мундагы профсоюз комитетининъ председатели, 3 йылдан бери ЕГЭ, ОГЭ окув сынавларды аьзирлевде эм оьткеруьвде ортакшылык этеди.
«Йыл сайын аьдетке кирген Окытувшы, 23-нши февраль, 8-нши март куьнлеринде мектебте туьрли конкурслар, ойынлар уйгынлап, исси боьртенъке ногай шайын асып, сонынъ тоьгерегинде йыйылып тыншаямыз. Сол шараларга бизим ветеранларымызды шакырамыз, оларды уьйлерине барып кутлаймыз, пенсионерлерди тийисли тыншаювына озгарамыз. Туьрли соравлар бойынша ис кенъесуьвлерин оьткеремиз», – дейди М.Терекбаева.
Марьяна Тойшы кызы мектебтинъ окув методикасын онъламага ярдам этеди, мектебте, районда, республикада семинарларда катнасады. Коьп йыллар узагында КНД-ди басшылаган.
Аьдемнинъ акында айтканда, онынъ эткен ислерине коьре баа бериледи. М.Терекбаева авыл мектебининъ, районнынъ, республикадынъ билим тармагыннан, профсоюздан онлаган Сый грамоталары, дипломлары, разылык хатлары ман савгаланган. Боьтен де оны оьз окувшыларынынъ алган эм алатаган савгалары эм оьз кесписин сайлаган окувшылары Альбина Межитова, Бриллиант Джуманбетова эм сондай баскалары суьйинтеди.
Марьяна Тойшы кызынынъ аьели – авылымыздагы абырайлы аьеллердинъ бириси. Эри Камел авыл мектеб директорынынъ хозяйство бойынша орынбасары болып куллык этеди. Онынъ эки де кызы йогары билим алганлар. Айнара – Нефтекумск каласындагы орталык банкта, Зумруд – Буденновскта аьскер боьлигиндеги кадрлар кесегинде куллык этеди. Буьгуьнлерде М.Терекбаева оьзининъ уьш йиенлерине куьзленип яшайды.
С.Межитов,
Куьнбатар авылы.
