Махачкалада, Алим-Паша Салаватов атындагы Кумык драма театрында Дагестан Халк поэти, Дагестан Язувшылар союзынынъ Правлениесининъ секретари, ДР ат казанган маданият куллыкшысы Анварбек Култаевтинъ яратувшылык кешлиги болып оьткен.

Кешликти Култаевтинъ адабиат оьнери акында коьнъилли лирикалы соьзи мен ДР ат казанган маданият куллыкшысы Сабират Абубекерова ашты.
Анварбек Утей улына каратылган Ногай район аькимбасынынъ куллыгын юритуьвши Хамидулла Саитовтынъ кутлавын онынъ орынбасары Арслан Кусегенов окыды. Онынъ соьзи мен, шаир, язувшы, журналист Култаевтинъ сав яратувшылык йолы – оьз халкына эм коьп миллетли дагестан маданиятына куллык этуьвдинъ таза уьлгиси.
Бизим эм коьп миллетли дагестан халкынынъ маданиятын саклавда эм оьрлентуьвде коьпйыллык яратувшылык куллыгы уьшин разылык соьзлерин шаирге «Ногай Эл» ФНКА регионаллык боьлигининъ председатели, Терекли-Мектеб авылынынъ аькимбасы Зейдулла Аджибайрамов каратты. «Култаевтинъ аты дагестан эм ногай маданиятынынъ данъкы болады, онынъ биографиясы бай эм кызыклы, титуллары оьзине тийисли эм белгили», – деди Зейдулла Аджибайрамов оьз кутлавында.
Кешликте Анварбек Култаевти Сырт-Кавказ федераллык округындагы РФ мусылманларынынъ дин управлениесининъ толы ыхтыярлы ваькили, «Казыят» фондынынъ председатели Рашид Акказиев кутлады эм Москвадынъ ногай ямагаты атыннан ога савга тапшырды.
Шарадынъ барысында шаирге каратылган ийги соьзлерин солай ок РФ Язувшылар союзынынъ секретари, шаир, публицист, критик эм коьшируьвши, «Москва литераторы» эм «ВЕЛИКОРОССЪ» адабиат-тарих журналынынъ бас редакторы Иван Голубничий де айтты. Дагестан Халк поэти Анварбек Култаев-язувшы, ногай язувшылар секциясынынъ етекшиси, оьз оьнери эм абырайы ман, оьзининъ хасиети мен ДР Язувшылар союзынынъ ис аьрекетине тийисли косымын этип келеди эм онынъ куллыгын айтып белгилейдилер».
Голубничий РФ Язувшылар союзы атыннан Анварбек Култаевке орыс язувшысы, шаир, Нобель баргыдынъ иеси Иван Буниннинъ дипломын тапшырды.
Култаевти кешликте оны ман бирге ислейтаган йолдаслары – ДР Язувшылар союзынынъ правлениесининъ председатели, Дагестан Халк поэти Магомед Ахмедов, ДР Язувшылар союзындагы орыс секциядынъ етекшиси, белгили коьшируьвши Марина Колюбакина, табасаран секциясынынъ басшысы, Дагестан Халк поэти Сувайнат Кюребекова кутладылар.
Яратувшылык кешликтинъ иесин онлайн байланыс тармагы ман айтувлы астрахань шаири, коьшируьвши Юрий Щербаков пан белгили калмык шаири Эрдни Эльдышев те кутладылар.
Култаевке багысланган оьз йылы эм юмарт йоравларын Ставрополь крайыннан келген шаир эм коьшируьвши Любовь Шубная, Дагестан Халк поэтессалары Шеитханум Алиева эм Аминат Абдулманапова, Астрахань областининъ ямагат организацияларынынъ ваькиллери, КЧР-деги «Маьметекей» балалар журналынынъ бас редакторы, шаир Асан Найманов, «Дагестан» ГТРК радиовещание службасынынъ начальнигининъ орынбасары Фируза Шерифова, белгили башкир поэтессасы Тамара Искандерия, ис ветераны Нарбек Аджигайтканов эм коьп баскалар айттылар.
Оьнер кешликте Патшалык ногай саз алатлар оркестрининъ эрлер йыр куьби, сол ок оркестрдинъ солистлери Ариф Темиров эм Бегали Куруптурсунов, Патшалык ногай драма театрынынъ актерлары («Фронттан келген хатлар» деген спектакльдинъ кесегин коьрсеттилер), сол ок театрдынъ актрисасы Оразбийке Кокоева, ДР Халк артистлери Дадаш Дадашев эм Хан Баширов, Леваши районынынъ «Авадан» деген халк хореографиялык ансамбли, ДР ат казанган артисткалары Фатима Нурлубаева ман Айгуль Джумагулова, «Айланай» фольклор-этнографиялык ансамбли, Ногай район Халк яратувшылык уьйининъ художестволык етекшиси Бурлиянт Курманова, яс артистлер, ятлав окувшылар Роза Колебаева ман Рашид Акимов эм баскалар белсенли катнастылар.
Кешликтинъ ызында оьз разылык соьзин йыйылганларга Анварбек Култаев айтты.
М.Ханов.
Суьвретте: ДР Халк поэти Анварбек Култаевтинъ оьнер кешлигинде.