Оьткен йылдынъ казан айынынъ 12-нши куьнинде Терк аьскерлик казаклар ямагатынынъ Кизлярдынъ айырым межелик округы бойынша 18 оьз ыхтыяры ман кеткенлерден 17 аьдем Аталыгымыздынъ межелерин коршаламага йол алдылар. Уьстимиздеги йылдынъ канътар айынынъ 17-нши куьнинде согыс спецоперациясында ортакшылык эткен оьз ыхтыяры ман кеткен казакларды Кочубей авылында шатлыклы аьлде хош алдылар.
Йолыгыста Дагестан Аькимбасынынъ эм Оькимет Администрация етекшисининъ биринши орынбасары Владимир Деревянко, Тарумов районынынъ аькимбасы Александр Зимин, Тарумов районынынъ аькимбасынынъ орынбасары Гаджиудрат Кебедов, Кочубей авылынынъ аькимбасы Мухуло Гитиномагомедов, район аькимбасы бойынша ясуьйкенлер советининъ председатели Магомед Ахбердилов, район ямагаты, коьлемлик билдируьв амаллары ортакшылык эттилер. Ийги аьдет бойынша казак аьскершилерин «Таловчанка» халк фольклор коллективи, 1-нши эм 2-нши номерли Кочубей авыл мектеблерининъ волонтерлары оьтпек, туз бан хош алдылар.
Оьткен йылдынъ куьзинде Кизляр, Тарумов районларынынъ эм Кизляр кала казаклары атаман Василий Наумочкиннинъ етекшилеви мен бирге согыс спецоперациясында катнаспага кеткен эдилер. Оларга оьз ыхтыяры ман Новогеоргиевский авыл аькимбасы Хабибула Халимов, «Единый Дагестан» деген ямагат организациясынынъ етекшиси Магомед Гаджимагомедов та косылдылар.
Оьз эрки мен кеткенлерди йолыкканлардынъ арасында Дагестан Республикасынынъ Аькимбасы эм Оькимети Администрациясынынъ етекшиси Алексей Гасанов та Дагестан Аькимбасы Сергей Меликовтынъ атыннан хошлав соьзлерин айтты эм йигитликлери уьшин разылыгын билдирип: «Бизим Элимизди бирев де енъмеек. Биз куьшли, ян ягымыздан бай, бизге бирев де карсы турып болмаяк.
Сыйлы йолдаслар! Ак юректен сизинъ аьеллеринъизге, оьзинъизге келеекте де бийик етимислер сагынаман», – деди.
Аьскершилерди толы тизиминде кайтувы ман Кизляр каласынынъ аькимбасы Александр Шувалов та кутлады. Ол казаклардынъ йигитлигин, каныгыслыгын баьри кизляршыларына да, боьтен де, ясларга уьлги болатаганын белгилеп кетти. Василий Наумочкин казаклар атыннан йылы йолыгыс эм эс уьшин разылык соьзлерин айтты. Район аькимбасы Александр Зимин казакларга службасы уьшин разылыгын билдирди: «Сыйлы яслар! Биз буьгуьн сизди тарумов еринде коьрип бек куванамыз. Аьеллеринъизге берк ден савлык, сизге тынышлык яшавына кирисип эм оьз исинъиз бен суьйикли Дагестанды оьрлентип келгенинъизди йораймыз. Савлайынъызга да ден савлык!» – деди ол. Казаклардынъ отряд етекшиси Василий Наумочкин яваплав соьзинде йылы йолыгыс уьшин разылыгын билдирди эм оьзин сондай яслардынъ арасында турып, олардынъ йигитлигин коьргенин эм эгер бу аьлге куьшлери керексе, олар аьли де онда кайтып бармага аьзир экенин айтты. Тагы да коьп савбол соьзлерин билдирди.
Оннан сонъ казаклар эм олардынъ касындагы делегация Кизляр каласына, ваьлий великомученик Георгий Победоносец Храмына йолландылар.
Суьвретте: йолыгыстан коьринис.
