Кыйынлык келгенде, Элимиздинъ, соны ман бирге Ногай шоьлдинъ, алал увыллары Аталыгымызды, кардаш халкты коршаламага турдылар. Олардынъ тамырларында ювырган, эркли ата-бабаларымыздан коьшкен кан йигитликке шакырды. Тувган ериндеги тынышлы, рахатлы, онъайлы яшавды калдырып, йигерли эр кисилер баьтирликке йол алдылар. Аьлиги, элимиз уьшин кыйынлы заманда, ногай ясларымыз тек патшалыктынъ буйырыгын толтырып тувыл, юрек шакырувы ман спецоперациядынъ катнасувшылары болдылар. Спецоперациядынъ баьри катнасувшылары да – баьтирлер, оьз эрки мен сондай иске кеткенлерди эки кайта баьтир деп санайман.
Терекли-Мектеб авылынынъ яшавшысы Салавдин Аметов Украинады денацификация эм демилитаризация этуьв бойынша спецоперациясында катнаспага оьз эрки мен кеткен. Ол Новороссийск каласында Кара тенъиз флотында службасын бардырган. Шешен еринде болган согысларда да катнаскан. Онда сапер болып ислеген. Бу куьнлерде Салавдин Юнусович Шешен Республикасынынъ Наур районынынъ Калинов станицасындагы аьскер боьлигинде толы болмаган мобилизация бойынша шакыртылган ясларды сапер исине уьйретеди.
Янъыларда Салавдин Аметов аьрекетлеген аьскер боьлигине онынъ анасы Вайдат Аметова, Ногай район Хатын-кызлар советининъ председатели Асият Манкаева бардылар. Хатынларды Салавдин мен йолыгыска савлай орамы йолга салды. Ясуьйкенлер насихат соьзлерин айттылар, хатынлар зияпетлер аькелдилер. Ногай район аькимбасы Джамалутдин Эсиргепов та хатынлардынъ йол шыгувына оьз уьлисин этти.
Салавдин Аметов куллык эткен аьскер боьлигинде хатынлар инженер-сапер ротасынынъ командирининъ исин кесек заманга юритуьвши Абдулмухтар Лахидов пан бирге толы болмаган мобилизация бойынша шакыртылган яслар ман аьллестилер. Ол Дагестан Республикасынынъ Казбек районында тувган, бу аьскер боьлигинде 20 йылдан артык аьрекетлейди. Абдулмухтар Гаджиевич бизим ердесимиз акында бек аьруьв соьзлер айтты. Ол Салавдин Аметовты бек танъ, аьскер исти ийги билген аьдем эм мундагы яслар сырасында сыйы бар экенин белгиледи. Сондай соьзлер етекшилевиннен эситуьв анага уьйкен куьез тувыл ма?
Хатын-аналар. Олар Аталыкты коршалавшыларды оьстирип тербиялайдылар. «Аьвлетим йигерли йигит, намыслы аьдем болсын», – деп асыл этип, аналар увылларын киели борышын толтырмага йолга саладылар. Бу исти баьтирлик деп ким айтпас? Эл алдында эр борышын толтырмага кеткен йигитлери мен бирге аналардынъ навасы да, рахатлыгы да, ойлары да алыска кетедилер. Оларга «анам» деп уьйине аман-эсен кайткан увылынынъ сесин эситуьв мен байланыслы мырат яшамага куьш береди. Вайдат Аметова да «анам, биз де атайларымыздай болып явды енъдик, эндиги савлай дуныяга тынышлык болсын» деген соьзлерди эситпеге мырат этетаган болар. Элимиздинъ хатынларынынъ сол мырады тезден толсын деп йорав этемен.
Вайдат-абамызга да бу йолыгыс куьш берди. Асият Бадиевна ман бирге ол аьскер боьлигиндеги ясларга йылы кийимлер, аналардынъ коллары ман согылган юн шораплар, дарманлар, балалар ясаган суьвретлер аькелдилер. Олар сыпырага туьрли таьтли азыклар, даьмли эт эм ынъкал аслар туьздилер. Хатынлардынъ каьр шегуьви эм коьтергишлеви ясларга мундай аьллерде коьнъилине етуьвде бек керекли эди. Абдулмухтар Лахидов белгилегенлей, олар баьриси де тувралык уьшин куьреске аьзирленетаганларын эм сол тувралыкты тутканлар енъуьвши болмага керегин биледилер.
Н.Кожаева.
Суьвретте: аьскер боьлигинде.
