9-ншы Май куьнинде, совет халкынынъ Уллы Аталык согысында немец-фашист Германиясын Енъуьвининъ 76-ншы йыллыгында, Ногай районында давдан кайтпаган ердеслерди эм согыс ветеранларын эскердилер.
Район орталыгы Терекли-Мектеб авылында Енъуьв байрамы аьдетке коьре ногай халкымыздынъ Баьтирлер аллеясындагы эстеликлерге шешекейлер байламларын салувдан басланды. Бу мунълы эм сыйлы шарада район орталыгынынъ баьри де ис коллективлери катнастылар. Сонынъ алдындагы куьнде районнынъ баьри де авыл ерлеринде оьзлериннен давга кеткенлерди атлы-атлары ман эскердилер эм байрам шараларын оьткердилер. Район ерлери, неге десе толы кебинде 1942-нши йылдынъ яз-куьз айларында кесек заманга немец-фашист баскыншыларынынъ колы астында калган. Сол ок йыл куьзде районды душпаннан Махач Дахадаев атындагы ерли партизан отрядынынъ агзалары ман генерал-лейтенант Николай Кириченкодынъ 4-нши гвардиялы атлы корпусынынъ аьскер боьликлери босатканлар.
– Бизге бу Енъуьв кайдай баага олтырганын аьруьв билемиз эм Тувган Элимиздинъ эркинлиги эм бойсынмаслыгы уьшин баьтирлерше куьрескенлердинъ согыс эм ис йигитликлери алдында басларымызды иемиз. Ногай районыннан фронтка кеткен 2500 аьдемнен кери ызына тек 600-ге ювыгы кайтып келген. Буьгуьн бизи мен бирге Уллы Енъуьвдинъ байрамын согыс ветеранларынынъ 3 тул хатынлары ман 16 тыл куллыкшылары йолыгадылар. Оькинишке, буьгуьн арамызда согыс ветеранлары калмаган. Бизим борышымыз – олардынъ атларын оьмирлетпеге эм совет аьдемлердинъ эрлиги эм оьз-оьзлерин аямаганлыгы акында дурыслыкты сакламага, – деп белгиледи сонъында район яшавшыларына каратылган кутлав соьзинде Данъклык мемориалы янында оьткен байрам митингинде Ногай район администрациясынынъ аькимбасы Мухтарбий Аджеков.
Мунда кутлав соьзи мен Ногай районынынъ Савытлы куьшлерининъ эм ыхтыяр саклавшы органларынынъ ветеранлар советининъ председатели Акманбет Сангишиев те шыгып соьйледи. Онынъ айтувы ман, 1945-нши йылдынъ май айындагы Енъуьвимиз фронттынъ эм тылдынъ баьтирлерше куьш салувлары эм бирлиги мен болдырылган.
– Буьгуьн, ортак Енъуьвимиздинъ байрам куьнинде биз согыста ян бергенлердинъ эм согыс ветеранларынынъ эстелиги алдында басларымызды иемиз. Олар дайымлыкка бизим эслеримизде калаяклар! Ясларымызга енъуьвшилердинъ йигитлигине тийисли несил болынъыз деп шакырув этемен, – деди Акманбет Мусаевич.
Дагестан Республикасынынъ Халк Йыйыны, КПРФ Дагестан рескомы эм Ногай райкомы атыннан район яшавшыларын регион парламентининъ депутаты Мурзадин Авезов кутлады.
– 100 йыллардан артык тарихи болган бизим Коммунистлер партиясы Уллы Аталык согысында совет халкын Енъуьвге даьвлендирген эм соны уйгынлаган, – деп белгиледи ол.
Митингте солай ок район яшавшыларын Терекли-Мектеб авылда орынласкан аьскер боьлигининъ командири Магомед Гаджимагомедов, Ногай район Хатын-кызлар советининъ председатели Асият Манкаева да кутладылар.
Байрам митингининъ катнасувшылары Уллы Аталык согысында дав кырларыннан кайтпаган ердеслеримиздинъ эстелигине шешекей байламларын салдылар. Муннан сонъ баьриси де давда ян бергенлердинъ, баьри согыс ветеранларынынъ мутылмас эстелиги алдында бас ийдилер.
Митингтен сонъ халк саз алатларынынъ патшалык ногай оркестрининъ меканынынъ алдында байрам концерти болып оьтти. Концертте халк арасында кенъ белгили эм согыс йылларындагы суьйикли йырлар йырландылар. Сонда «Айланай» патшалык фольклор-этнографиялык ансамбли, патшалык оркестрининъ солистлери, саниятлар мектебининъ эм районнынъ орта мектеблерининъ окувшылары ортакшылык эттилер.
Район орталыгынынъ стадионларында спорт шаралары болып оьттилер. Енъуьв куьнин байрамшылав сол куьннинъ кешесинде концерт программасынынъ экинши кесегин коьрсетуьв эм байрам фейерверки мен кутылды.
Бизим хабаршы.
Суьвретлерде: Терекли-Мектеб авылында Енъуьв байрамы куьнинде.
