Бу байрам Дагестан еринде быйыл тувра оныншы йыл белгиленип туры. Сол 2011-нши йылдынъ 15-нши сентябринде Дагестан халкларынынъ бирлигине багысланган биринши байрам шаралары болып оьткен. Сонынъ бас ниети – республикада яшайтаган баьри де халкларды бирлестируьв эм тыпакластырув.

Дагестан Республикасы этнослар ягыннан Россия регионлары арасында энъ де коьп санлы болады. Олай да уьйкен болмаган кесек ерде 100-ге ювык туьрли миллетлер эм халклар тынышлыкта яшайдылар. Солардынъ ишинде ерли миллетлер деп аварлар, даргинлер, кумыклар, лезгинлер, лаклар, табасаранлар, ногайлар, татлар эм баска туьрли миллетлер саналадылар. Дагестаннынъ коьп оьмирли тарихи сонда бола-болганлы яшайтаган халклардынъ оьзлери ара уллы дослыгы эм бирлиги акында коьплеген шайытларды саклайды. Олар бир неше кере регионга кырдан шапкынлык эткен явларга карсы бирге коьтерилип согысканлар эм енъгенлер. Дагестан яшавшыларынынъ бирлиги боьтен де олардынъ ерлери, тавлары, тувган эм ювык аьдемлерининъ бактылары уьстинде кыйынлык энгенде айлак та яркын кепте коьринген. Айтпага, бу байрамнынъ куьнин Дагестан етекшилери босына беркитпегенлер, неге десе 1741-нши йылдынъ 15-нши сентябринде дагестан халклары бирге косылып оьз ерлерине баскыншылык эткен иран аьскер басшысы Надир-шахтынъ коьп санлы аьскерлерин бузгышлаганлар. Соьйтип, дагестан халклары бирлесип коьп сынавларды йигитлерше оьткенлер. Оьткен оьмирде Уллы Аталык согысы, оннан сонъгы тынышлы ис йылларында, 1999-ншы йылдагы халклар ара террорист куьплерине карсы урысларда дагестанлылар тагы да бир кайта оьзлерининъ бирлигин, берклигин эм дослыгын сав элге, дуныяга яркыратып коьрсеттилер.
Соны ман бирге мундагы миллетлер арасында бурыннан бери бир-бириси мен экономикалык катнасувлары да беркип келген. Тавларда яшайтаганлар туьзликтеги конъысларына емис, коз продуктларын, куьмистен, езден этилинген ыспайлыклар, уьйшилик алатларын, туьзликтеги яшавшылар оьзлерининъ кыйыны ман оьстирген мал, эт, эгин культураларын тавдагыларга элтеп юргенлер.
Буьгуьнлерде республика халклары рынок экономика катнасувлары шагында тек оьз-оьзлери мен тувыл, баска регионлардагы миллетлер мен де тар байланыслар тутып, ис эм яшав аьрекетин бардырадылар. Сол катнасувлар эм аьрекет аьлиги заманда регионды Сергей Меликов етекшилеген аьсерде янъы оьрленуьв йолына шыгып туры эм алдыдагы йыллар, онынъ айтувы ман, дагестанлылардынъ яшав сапатын арттырув уьстиндеги борышларды шешуьвге каратылады.
Аявлы ердеслер! Баьринъизди де сондай да ийги эм йылы, танъ эм ярык байрам ман кутлаймыз, аьр биринъизге ден савлыкты, берк дослыкты, уьстинликлерди, наьсипти эм илгери оьрленуьвди йораймыз!