Яшав деген бизди бирерде неге де коьндиреди, кайдай кыйынлыкка да йолыктырады. Тек биз бир де аявсыз Ажал анъсыздан ийги деген ювыкларымызды, тенъ-досларымызды, авылдасларымызды, ис йолдасларымызды алып кетуьви мен макул болып болмаймыз. Сога халкымызда аявсыз ашшы йойым деп те айтылады.

Сондай йойым ман ана тилиндеги газетамыздынъ редакциясы ызгы куьнлерде йолыгысты. Редакциямызда оьзининъ уьйкен йолдасларынынъ йолын алып келеяткан яс ис йолдасымыз Аминат Каракаевадынъ аьдем суьер каьмбил яны анъсыздан оьрдеги аспанга синъип кетти…
Аминаттынъ акында эндиги йок деп айтпага кыйын, неге десе аьли бир неше йыллар узагында, тек быйыл кыста, язлыкта, яз басында да ол бизи мен бирге енъил болмаган редакция куллыгын ортак боьлисип келди. Куьз эндиги дуныяга янъы-янъы оьз патшалыгын кайтадан курып турган аьлемет аьсерде ол бир-эки куьнге исине шыккан эди. Сол шакта анъламастан: «Эндиги оьзиме эмленмеге туьсти», – деп бизим аьр биримиз бен йылы аманласып кетти. Бу аманласувы онынъ бизи мен энъ ызгы аманласувы болып турганын бирев де билмеди, элбетте, Аминат оьзи де. Кайсы аьдем де врач ога кайдай авыр мараздынъ белгисин салса да, ийгиликке сенеди. Аминат та соьйтип сенген болар. Тек биз биревимиз де кысметтен куьшли тувыл.
Быйылгы йыл онынъ уьшин каты болып туьзилди, ога коьп кыйналмага туьсти. Сав язды ол эмленип турган балалары ман алыстагы Москвада оьткерди. Оларга операция эттиртип, балаларынынъ янында канатын яйган ана кустай болып, оларды коршалап, кешеси-куьни карав берип, янларында турды. Сонынъ оьзинде де ол редакциямыздынъ куллыгына да ярдам этпеге шалысатаган эди. Бир соьзсиз, бу сынав да онынъ ана юрегине авыр юк болып илинди, шаркында обыр тырнакларын яйып баслаган маразына куьш берди. Ол сол заман оьзине эмлев алув акында ойлаган да этпеди, дурысында, ойланган болса да, бир амалы да йок эди, балаларга авырыган аьсеринде анадан оьзге ким таяв болмага болады? Соьйтип ол оьз янын балалары уьстинде тувган каранъа куьнлерди ярыклатайым деп энъ ызына дейим ягып салды. Оьзин эмлевге кешигип кетти…
Аминат бек билимли, куллыксуьер, тербиялы, рагимли кыскаяклы болса да, оьзин «мине мен» деп бир де алдыга салмага ымтылмаган. Ол газетадынъ редакциясында оьзининъ уьйкен келеектегиси болган куллыкшылардынъ бириси эди. Газетадынъ сайтынынъ редакторы болып ога не куьндиз, не кеше, тыншаюв куьнлерсиз де билек туьрип ислемеге туьскен.
Уьйкен авыр йойым ман байланыста Аминат Каракаевадынъ аьелине, балаларына, баьри де кардаш-ювыкларына бассавлык йораймыз. Онынъ аьдемшилиги, таза келпети, аьлемет танъ хаьсиети эм ис суьерлиги редакция куллыкшыларына, оны таныган-билген аьр аьдемге оьмирлик эс болып сакланар.
М.Ханов.