Окытувшыдынъ ис аьрекети тек билимли болувды талаплап калмайды, бу кеспиди сайлаган аьдемде шыдамлык касиети болмага керек. Болса да, бу тыныш болмаган кеспиди аз аьдемлер сайламайдылар, а сайлаганлар болса, юрегининъ терен сезимлерин, савлай яшавын исине багыслап келгенлер де бар. Сондай аьдемлердинъ сырасында Ногай районымыздынъ уьйкен болмаган авылларынынъ бириси Калининаулынынъ С.Капаев атындагы орта мектебинде коьплеген йыллар ис аьрекетин бардырып келетаган Марувхан Казу кызы Бальгишиева болады десем оьтирик болмас. Ол Ногай районымыздынъ орталыгы Терекли-Мектеб авылында тувып-оьскен. Балалыгы да, яслыгы да сонда оьткен. Ерли мектебти уьстинликли окып битиргеннен сонъ, Марувхан окытувшы кесписин сайлап, Дагестан Республикасынынъ бас каласы Махачкаладагы педагогикалык йогары окув ошагына туьспеге ниет этеди эм сонда сынавларды оьтип, филология факультетининъ студентлерининъ сырасына кирип, окувын баслайды. Студент йыллары да яшав ман бирге йылысып кеткен. Ол сайлаган кесписине 50 йылга ювык заманын алаллыгы ман берип келеди.
Окытувшы оьзининъ педагогикалык ис аьрекетин Ногай районымыздынъ Орта-Тоьбе авылында баслаган эди. Ол сол заманлардан алып, аьр бир дерисине уьйкен маьне берип, аьр бирисин кызыклы этпеге шалысып келеди. Онынъ бир дериси экиншисине усамас, заман ман бирге абытлап, янъы технологияларды да дерислеринде ол кулланады. Онынъ оьзининъ айтувына коьре, окытувшы – ол оьзи тербиялавшы, оьзи ата-ана орынына.
Марувхан Казу кызын бактысы сонъында Орта-Тоьбе авылыннан Калининаулына аькелди. Мунда ол оьзининъ байыр наьсибин де тапкан деп айтпага болады. Авылдынъ йигерли ясларынынъ бириси мен Сапарали Бальгишиев пен татым аьел курып, доьрт аьвлетти асырап-оьстиргенлер. Аьр кайсысына да суьйген кесписин алмага, яшавда оьз орынларын таппага аз куьшлерин салмаган, колларыннан келген ярдамын эткенлер.
Марувхан Казу кызы Бальгишиева оьз ериндеги аьдем деп айтпага болады, ол билимлендируьв тармагында коьп етимислерге етискен – окытувшыдан мектеб етекшисининъ окув бойынша орынбасары, мектеб етекшисине дейим етти.
Ол мектеб етекшиси орынында ис аьрекетин бардырган заманларда аьр бир окытувшыдынъ эбин тапкан, аьр бирисининъ кайгысын да, куванышын да боьлисип болган етекши эди. «Сыйлаган аьдем сый табады» дегенге усап, сондай аьдемди кайтип сыйламайсынъ.
Оннан баскалай, Марувхан Казу кызы – яратувшылыклы ислемеге де бек суьетаган инсан. Ол коьплеген шараларда катнасады, кайсы ерде де савгалы орынларды алады. Ол оьзининъ етимисли ис йыллары ишинде «Йыл етекшиси», «Россия Федерациясынынъ ат казанган окытувшысы» деген дережели атларга тийисли болган. Онынъ ис аьрекети бойынша алган Сый грамоталары ман разылык хатларынынъ санын да келтирип болмайсынъ.
Бизим сыйлы Марувхан Казу кызы Бальгишиева буьгуьнлерде оьзининъ 70 йыллык мерекесине сондай уьстинликлер мен етискен аьдем. Биз онынъ ис йолдаслары оны ман бек оьктемсиймиз эм алдыда тек ийгиликлерди, балаларынынъ, олардан тувган аьвлетлердинъ уьстинликлерине суьйинип турганды йораймыз. Сиз, Марувхан Казу кызы, бир неше несилди тербиялавга оьзинъиздинъ куьшинъизди аямагансыз, эткенинъиз мынъ кере артып кайтсын.
С.Янгазиева,
Калининаул мектебининъ окытувшысы.
Суьвретте: М.Бальгишиева.
