Аьлиги заманда шоьл яслары эм кызлары кырга кетип ислейдилер, оькинишке, балаларымыз сийрек келедилер тувган ерине, яй тыншаювларда тетей-атайлар ман турадылар, сол кишкей кесек заманнынъ ишинде бираз ногайша да уьйренедилер. Соьйтип, Бийислам эм Магира Мамуровлар Ногай районынынъ Кумлы авылыннан Норильск каласына ислемеге кеткенде, увылы Амир 5 ясындагы бала эди, аьлиги заманда ол – 6-ншы класстынъ окувшысы.
Ети ясыннан алып Норильск каласынынъ ерли ямагат миллет автономиясынынъ атыннан туьрли шараларда катнасады. Онынъ сахнага шыгып биринши кере йырлаган йыры «Салам, ногай халкым» деп аталган. 4 йыл узагында Амир саниятлар мектебине юреди. Ол мектебте де ийги окыйды, тарих, эсап, география, адабиат сабакларын суьеди, олимпиадаларда биринши орынларды алады. Амир спорт пан да аьвлигеди, эркин куьрес бойынша секциясына юреди. Уьйде иниси мен шатраш ойынын ойнайды, техникады суьеди. Талаплы кеде йырламага бек суьеди, синтезаторда ойнайды, мен ойлайман Амирге бу оьнер уьйкен атасы Шора Мамуровтан келгендир, ол йырлайды эм 4 саз алатларда ойнайды, атасы Бийислам да йырлайды. Уьйкен атасынынъ мерекели шатлыгында Амир «Домбыра» деген ногай йырын йырлаган.
Амир келеекте военный болмага суьеди, онынъ айтувы ман, бу кеспи эр кисиде эрклик, йигитлик касиетлерин эндиреди. Ол туьрли регионлар ара озгарылатаган, савлайроссиялык фестивальлерде, конкурсларда катнасады. Солардынъ ишинде – Кадрияга багысланган эс кешлиги, бу шарада Амир «Ата юртым» деген ятлавды окыган.
Янъыларда Амир Мамуров «Несил» деп аталган эстрада йырынынъ регионлар ара озгарылатаган конкурсында катнасып, баргылы биринши орынды алды. Бийислам эм Магира Мамуровлар Ногай шоьлден узак яшаса да, балаларын ногайша соьйленъиз деп уьйретедилер, аьелде ногай аьдетлер акында айтылады, хабарлар, эртегилер ногайша окылады.
Оьнерли балалар акында язамыз, олардынъ уьстинликлерине суьйинемиз, баскаларга коьрим этип коьрсетемиз. Амир Мамуровка яшав йолында уьстинликлерге етискенин, уьйкен болып оьсип, Ногай шоьлдинъ данъклы увылы болганын йорайман. Талаплы саьбийге: «Оьнеринъ артсын, Амир» деп айтамыз.
Г.Абдулакимова.
Суьвретте: А.Мамуров.
