Белгили ногай шаири Мурат Авезовтынъ 70 йыллык мерекесине багысланып, янъыларда балалар район китапханасында «Меним яс несилиме» деп аталган ятлав окув конкурсы уйгынлы оьтти. Конкурста А.Джанибеков эм Кадрия атындагы мектеблерининъ 1-8-нши классларынынъ окувшылары катнастылар.
Оларга белгиди Кадрия атындагы мектебининъ ана тилининъ эм адабиатынынъ окытувшысы Насипхан Хасбулатова, Куьнбатар авыл мектебининъ китапхана куллыкшысы Арапа Шекирова, орталык район китапхана методисти Айгуль Бийбулатова бердилер. Балалардынъ шаирдинъ яратувшылыгы ман кызыксынувын оьстирер ниетте, китапхана бек ийги этип безекленген эди: Мурат Авезовтынъ китаплери эм туьрли суьвретлери туьзилип салынган. Бас деп келген конакларды балалар китапхана етекшиси Зульфира Биймурзаева хошлады. Ол балаларга Мурат Авезовтынъ шыгарган китаплери, яратувшылык йолы акында хабарлады. Сонъ шара юритуьвши методист Зарема Джумалиева энъ де кишкей эм биринши конкурс катнасувшысы Суюмбике Акманбетовады ятлав окымага ортага шакырды. Элбетте, бу куьн китапханада йыйылганлар балалардынъ ана тилинде ятлав окув оьнерине сукландылар. Саьбийлердинъ шалысувы, аваслыгы куьшли эди. Аьр бир конкурс енъуьвшилерсиз болмайды. Буьгуьнги шара сырагылары бойынша баслангыш класслардынъ окувшылары сырасында 1-нши орынды Эмиль Башантавов, 2-нши орынды Карим Сариев, (3-нши класс окувшылары), 3-нши орынды Суюмбике Акманбетова бийледилер. (Олар Кадрия атындагы мектебининъ окувшылары). Бу окувшылар Мурат Авезовтынъ «Савкат», «Арбага ким егилген», «Коьз алдымнан таймайсынъ» деген ятлавларын окыдылар. Ортаншы класслар окувшылары сырасында 1-нши орынга Кадрия атындагы мектебининъ 7-нши класс окувшысы Милана Абдулмусаурова, 2-нши орынга Кадрия атындагы мектебининъ 6-ншы класс окувшысы Амирлан Толемишов, 3-нши орынга А.Джанибеков атындагы мектебининъ 5-нши класс окувшысы Айгуль Картакаева тийисли болдылар. Орынларды бийлеген ортаншы класс окувшыларына мерекеши шаирдинъ «Бир увыс топырак, бир увырт сув», баслангыш класслар окувшыларына «Четыре времени любви» деген китаплери савгага берилдилер. Конкурста катнаскан баска балаларга Сый грамоталар тапшырылды.
Насипхан Хасбулатова балалар орталык китапхана куллыкшыларына уьйкен савбол айтты.
Ызгы йыллар тил маьселеси оьткир турады. Балаларымыз ана тилин уьйренуьвде уьйкен аваслыгы сезилмейди. Биз оларга тил йок болса, халк та йок болаягын анълатпага шалысамыз. Бу куьнги ятлав окув шарасында ана тилин суьйген, шаирлеримиздинъ яратувшылыгы ман кызыксынган окувшылар йыйылган эдилер. Сондай окувшылар бизди суьйиндиредилер.
Н.Кожаева.
Суьвретте: 1-нши орынды бийлеген окувшы Э.Башантавов.
