Тек Орта-Тоьбе авылында тувыл, ногайлар яшайтаган коьплеген ерлерде белгили Мавлимберди Кишинеевтинъ аты. Тамада, йырлавшы, маданият куллыкшысы, онынъ оьнери мен, занъыраган сеси мен баьримиз де сукланамыз. Кызы Сабинага да онынъ оьнери коьшкенине биз суьйинемиз, ол коьплеген йыр эм ятлавды яттан окув конкурсларынынъ енъуьвшиси болады. Янъыларда мен социаллык тармакларында аьскер кийимин кийип, Мавлимберди оьзининъ унык кызы Альбина ман шыгып йырлаганын коьрдим эм кишкей йырлавшы ман сукланмай болмадым.

Альбина Кишинеева Орта-Тоьбе авыл мектебинде биринши класста окыйды. Биринши окытувшысы Ашувхан Исламали кызы Отевовадынъ айтувы ман, ол окымыслы, билимли кызалак. Альбина авылда, мектебте болатаган баьри шараларда да оьзининъ йырлав эм биюв оьнерин коьрсетеди. Белгили шаиримиз, Орта-Тоьбе авылдынъ данъклы увылы Мурат Авезовтынъ 70 йыллык мерекесине багысланган шатлыкта ол «Ана» деген йырды йырлады. Мектебте озган «Йигерлик, Эрклик эм Намыс» дерисинде ол ятлав окыды. Альбина онлайн-олимпиадаларында катнасып, грамоталарга тийисли болады. Окымыслы кыздынъ уьстинликлери аьли алдыда деп шекленмеймен. Аьдетинше, оьткир балалардан бек ийги окувшылар болады.
«Сен ким болмага суьесинъ?» деген соравга Альбина «врач-стоматолог» деп яваплайды. Онынъ мыратлары толсын деп ак юректен йорайман. Бала оьнерли, билимли болып оьскени баьримизге де куьез. Атайы Мавлимберди эм тетеси Зарема, ата-анасы Рустам эм Ралина бек суьйинедилер Альбинадынъ сахнага шыгып йырлаганына. Кыздынъ уьйкен энеси, аьлемет сесли Шафиха Менглибаева немересине куьезленип, баьри ийгиликлерди йорайды. Биз де сол йоравларга косыламыз.
Г.Абдулакимова.
Суьвретте: Альбина Кишинеева.