Милана Абдулмусаурова Терекли-Мектеб авылында яшайды, Кадрия атындагы орта мектебинде окыйды. Ийги окувшы, белсенли кызалак дайым да мектебте эм район бойынша балалар арасында оьткерилетаган туьрли конкурсларда катнасады эм савгалы орынларды казанады. Авыл хабаршымыз Салимет Майлыбаева янъыларда оны ман йолыгысып, хабарласув оьткерген.

– Милана, сен – Кадрия атындагы орта мектебининъ энъ билимли окувшыларынынъ бириси. Сени биз район бойынша озган ятлав конкурсыннан аьруьв таныдык, ногай тилди суьетаганынъды да анъладык. Буьгуьн бизге оьз аьелинъ акында айтканынъды суьемиз, сизде неше аьдем, кайдай ийги аьдетлеринъиз бар, кайсы байрамларды суьесиз. Оьз аьелинъди не мен тенълестирер эдинъ?

– Амансыз ба, Салимет Ахматовна, амансыз ба, баьри газета окувшылары! Мен – Милана Абдулмусаурова. Татым, тыпак аьелде яшайман. Атам Равиль район боьлигинде следователь болып ислейди, анам Фаризат – ультразвук диагностикасынынъ врачы. Аьптем – Сафира эм кишкей аданасым – Ислам. Бизим аьелде аьруьв аьдет бар: баьри байрамларда да бас деп ясуьйкенлерди кутлаймыз, оннан сонъ – калган ювыкларымызды. Меним суьйикли байрамларым: янъы йыл, тувган куьним, Ораза байрам. А оьз аьелимди мен ак кувлар ман тенълестирер эдим, сосы куслардай таза, ыспайы яшап алдыга юрмеге.

– Милана, бек кызыклы сенинъ аьелинъ акында тынъламага. Мектеб акындагы соравларыма не деп яваплар эдинъ? Сизинъ класс кайдай, ийги окыйтаганлар коьп пе? Кайсы дерислерди артык суьесинъ?

– Бизим Кадрия атындагы мектебимиз энъ куьшли мектеблер санына киреди. Меним классымда да ийги окыйтаган балалар бек коьп, йырма доьрт балады класс етекшиси Сыйлыхан Казбековна, ногай тилден Насипхан Ибрагимовна окытадылар.

– Кайдай конкурсларда катнасасынъ, кайдай грамоталарынъ бар?

– Мен доьрт йылдынъ ишинде бек коьп конкурсларда катнастым. Бу йыл баслапкы класслар арасында оьткен «Йыл окувшысы» конкурсында 2-нши орынды алдым, ногай адабиаттан ятлав ярысында да 2-нши орынга тийисли болдым, «Степные голоса» («Шоьл тавыслары») деген конкурста 3-нши орынды бердилер.

– Сен туьрли яктан оьнерлисинъ, китаплер окымага суьесинъ ме, китапханаларга барасынъ ма?

– Китаплер – меним алал досларым. Уьйимизде олар бек коьп: энциклопедиялар, эртегилер, ятлав йыйынтыклар. Китапханадан да алып окыйман.

– Телевизордан кайдай передачалар карамага суьесинъ?

– Мен согыс акында кинолар, балаларга – «Ералаш», «Элгезерлик» акында передачалар карамага суьемен.

– Мектебте кайдай кружокларга юресинъ?

– Мен «Карлыгаш» ансамбльде бийиймен. Пионерлер уьйинде вокал кружоккка юремен эм суьврет ясав оьнеримди оьстирер уьшин сол кружокка да суьйип юремен.

– Милана, бос заманынъда не этпеге суьесинъ?

– Бос заманымда бебем мен ойнайман, анамнан эм абамнан тигип, согып уьйренемен.

– Каникулларынъ кайтип озадылар?

– Каникулларым аьелим мен аьжейипли ерлерге кезуьвден басланды. Волга (Эдил йылга) бойы ман Волгоград, Саратов, Казань калаларында болдык. Казань калада бек ыспайы ерлерди коьрдик: Суьйимбийке минаретин, кул-шариф межигитин, тагы да бек ярасык ерлерде экскурсияда болдык.

– Оьзинъдей балаларга, сав ногайларга буьгуьн не деп айтар эдинъ?

– Мен баьри балаларга да ийги окувды йорайман, мектебти битирип, оьзлери суьйген ерлерине туьссинлер, йоллары ашык болсын. Ногай халкымыз куьшли болсын, ногай тилин, аьдетин бир де мутпасынлар.

– Милана, сага мен йорайман тек уьстинликлерди, ата-ананъа, окытувшыларынъа сен уьшин савбол айтаман. Ашык йол сага!

Хабарласувды Салимет Майлыбаева юриткен.