Ногай районымыздынъ берекетли Карагас авылында Рамазан айына сый этилинип, «Самида» атлы банкет залында хатынлар маджлиси бек ярасык болып оьтти. Оны уйгынлавшылар: Карагас авылынынъ хатын-кызлары эм «Гьидаят» хатынлар организациясы эди. Кешликти Мухаммад Менласанов куран окув ман баслады. Авыл имамы Абдул Адисов баьри йыйылганларды кутлап, оьз разылыгын мекан иесине, баьри авыл яшавшыларына билдирди. Маджлистинъ бас мырады хатын-кызларды сосы айда бириктируьв, ийги ислер этуьвге шакырув, Рамазан айынынъ йылы авасында тыншаюв эди.

«Ас саляму аляйкум, аявлы аьптелеримиз, мине баьрине де оьрметли йыл бойынша куьтетаган Рамазан айымыз оьтип барады, раьгимлик айы, наьсипли айымыз, Алла-Тааладынъ кеширетаган айы, сизди «Гьидаят» организациясы атыннан ак юректен кутлайман!» – деди юритуьвши Асият Манапова.
Суьйикли Пайхамбарымыздынъ (Алладан ога салам эм салават) энъ биринши тактага язган саклавшы соьзлери «Бисмилляхи-ррахмани –рахим» болган. Ога Джабраил (ога рахатлык болсын) келгенде, уьш кере айткан: «Бу сага эм сенинъ ямагатынъа, айт оларга, аьр исти баслаганда «Бисмиллады» мутпасынлар. Сонъ кишкей ярасык кызлар сосы темага конъырав сеслери мен нашид йырладылар.
Акыйкатлай да, Рамазан айы – неше коьп амаллардынъ шагы, куваныш, даьвренуьв заманы, кешируьв заманы, ол инсанга кайсы яктан да наьсип нурларын себеди, юреклерди тазалайды, коьп яхшылыклар этпеге, коьп садака этпеге шакырады. Эне солардынъ акында бек ийги этип айтты «Гьидаят» организациясынынъ етекшиси Амина Янгазиева.
Йыйылганлар уьшин бек кызыклы викторина оьтти. Енъуьвшилерге туьрли савгалар берилди. Баьрине де ярады аьдемнинъ ийги касиети акында насихатлы коьринис.
Маджлис кешлигин оьзининъ нашиди мен боьтен де ярасык этти Дагестаннынъ ат казанган артисти Айгуль Джумагулова. Дагестан муфтийи Шейх Ахмад Хаджи Абдуллаев хатыннынъ яшавдагы орыны акында бек аьруьв айткан эм сосы темага «Гьидаят» орталыгыннан Мунира Компазова хабарлады.
Карагас авылында оьнерли аьдемлер аз тувыл, солардынъ бириси Гульжана Самединова, ол да оьзининъ аьлемет ярасык тавысы ман нашидлер йырлап, баьрисининъ де коьнъиллерине етти. Солай ок Мадина Аджимурзаева эм онынъ окувшысы Амина Адисова арап тилде нашид йырлап эситтирдилер. Азиза Аджигельдиева 5-нши «а» класс окувшысы «Оразамыз басланды» деген ятлавды соьйленисли окыды.
Маджлиске тек Карагастан тувыл, Куьнбатар, Бораншы, Терекли-Мектеб авыллардан да хатынлар йыйылган эдилер. Олардынъ юзлериндеги нурлары залды йылувлык пан толтырган эди. Баьри зат та хатыннан басланады.
Хатын-ана, аьптей,
кыймас, карындас.
Алал косак, келин эм де
кайнана.
Айткан соьзи, эткен
иси мутылмас,
Юмаклыгы шешкен
сайын кутылмас.
Баьтирлерди,
сылувларды оьстирген.
Танъ сеси мен дуныяды
суьйдирген.
Аьр иси мен коьрим
болган кызына,
Сезимлерин салган
суьйим сазына.
Увылына иман,
йигер эндирген,
Балаларына алал
суьтин эмдирген.
Не зат артык
кыйыныннан
хатыннынъ?
Ян диреги аьелининъ,
халкынынъ.
Аьр куьн сайын
намазында ийилип,
Танъ атканга, коьз
ашканга суьйинип,
Сав Элине
рахатлыкты
тилейди,
Кудайыннан
разылыкты излейди.
Сыйлы конаклардынъ бириси – Федоровка каладынъ «Иман» саваплык фондынынъ етекшиси Арувхан Дадиковадынъ соьзлерин баьри де суьйип тынъладылар: «Алла-Таала суьеди онынъ уьшин йыйылганларды, коьрискенлерди. Сосындай йыйынларда маьлиеклер ушып юредилер эм суьйинедилер!» – деди ол. Карагас авылдынъ «Савап» фонды оны ман маслагатласылып ашылды эм бу куьнлерде коьп куллыклар этип турады. Онынъ етекшиси бизим сыйлы синълимиз Румия Сатырова болады.
Авылымыздынъ оьрметли ясуьйкенлери Гульжана Самединова эм Мария Абдулова оьзлерининъ разылык соьзлерин йыйылган бийкелерге айттылар. Олар сосындай юмарт йыйынлар алдыда коьп болсынлар деп йорадылар. Оьзек те, бизим сосы исимиз савапка язылсын деп тилек саламыз, эткен садакаларымызды Алла-Таала кабыл этип алсын деп тилеймиз. Садака деген соьздинъ маьнеси калай уьйкен-ав.
Ювыгынъа йылы
куьлсенъ, суьйип ога
салам берсенъ –
Сол садака.
Шакырганга шавып
барсанъ, ийилип онынъ
колын алсанъ –
Сол садака.
Конагынъа асынъ
ассанъ, юмсак айтып
йолга салсанъ –
Сол садака.
Душпанынъды кешип
билсенъ, маьселеди
шешип билсенъ –
Сол садака.
Балаларга билим
берсенъ, тербиялап
йол коьрсетсенъ –
Сол садака.
Сувсаганга сув
иширтсенъ,
йолавшыга йол
коьрсетсенъ –
Сол садака.
Анъ-малынъа ийги
карап, баьрине де
савлык йорап,
яшап турсанъ –
Сол садака.
Садака – ол ийги кылык, Алла уьшин алал куллык.
Ер юзинде баьримизди
баьлелерден сакласын,
Ахыретте шапагат
болып касымызда
яклассын.
Эне сосындай коьтеринъки коьнъил мен соьзимди тамамламага суьемен. Ораза-байрамды баьримиз де шат коьнъилде йолыгайык ИншАлла.
С.Майлыбаева.
Суьвретте: шара катнасувшылары.