Ногай район орталыгы Терекли-Мектеб авылында 2-нши сентябрь куьнинде Халк яратувшылык орталыгынынъ фасадында Терроризм мен куьресуьвде макулласув куьнине багысланган эстеликли митинг озды.
– Буьгуьнги бизим эстеликли акциямыз – ол терроризм курманлыкларына кайгырув эм ян авырув акциясы, ол терроризм мен куьресте бизим бирлигимизди, сога карсылыгымызды, дуныя халклары бу авыр кыянатлык аьрекетининъ яйылувынынъ йолын ябарлар деген сенимлигимиз болады, – деген соьзлери мен ашты эм юритти бу шарады район ЦНТ куллыкшысы Бурлиянт Курманова.
Ногай район администрациясынынъ аькимбасынынъ ямагат кавыфсызлыгы яктан орынбасары Баймагомед Ярлыкапов оьзининъ шыгып соьйлевинде буьгуьн биз элимиздинъ аьлиги замандагы тарихининъ кайгылы бетлерин эскеремиз деп белгиледи. Муннан 18 йыл артта Беслан каладынъ мектебинде болып оьткен теракт иси биз уьшин бек авыр эм юрек авырткан сынав болды. Сонынъ сырагысында юзлеген бир куьнасиз балалар оьлдилер, сакат болдылар, оьз кардаш-ювыкларын йойдылар. Бесланнынъ трагедиясы эндиги де коьп йылларга бизим юреклеримизде оьткир ян сызлавымыз болып калаяк.
– Биз буьгуьн солай ок Москвада, Волгодонскта, Махачкалада, Каспийскте, Буйнакскта, Кизлярда, Буденновскта эм баска ерлерде болып оьткен терактларды да эсимизге аламыз. Бизим дагестан халкымыз баскаларга коьре айлак та бек ювык сондай аявсыз каты терактлардынъ сырагыларын басыннан оьткерген. Биз солай ок 23 йыл артта республикамызга халклар ара бандит туьркимлери шапкынлык этип, аьдемлердинъ тынышлыгын бузганын да мутып болмаймыз. Элимиздинъ баьри де алал куьшлерининъ аьрекети, ямагатымыздынъ, власть органларынынъ, дин аьрекетшилерининъ тыпакласувы, ыхтыяр саклавшы органларынынъ иркуьвсиз куллык этуьви, Россия етекшилерининъ колтыклавы ман терроризм Сырт Кавказда каты бузгышланды, законшылык йорыклары кайтарылды эм буьгуьн де тутылып турадылар, – деп билдирди район аькимбасынынъ орынбасары.
Тек соны ман бирге, деди Баймагомед Ярлыкапов, Украина еринде болып турган буьгуьнги оьзгерислер ямагатка карсы каратылган кавыфлыклар эм шакырувлар эндиги де таймаганын коьрсетедилер. Россия аьскершилери, олардынъ арасында бизим де ердеслеримиз бар, аьлиги заманларда оьз яшавынынъ баасы ман Тувган Элимиздинъ бузылмаслыгын коршалайдылар. «Биз оьткен заманлардынъ дерислерин мутпага керек тувылмыз! Тек бирликте, аьдетли ян-коьнъил байлыкларына эм туьзилис сезимлерине, Тувган Элимизге суьйимликке, миллетлер ара макулласувга, динлер ара тынышлыкка эм ийги конъысылар аьдетлерине таянып биз тувган еримизди сакламага, социаллык маьселелерди шешпеге, районымыздынъ, республикадынъ, савлай Россиядынъ экономикалык оьрленуьвин канагатламага боламыз», – деп кутарды оьз соьзин район аькимбасынынъ орынбасары.
Терроризмнинъ кавыфлыгы эм баьлелери акында солай ок митингте шыгып соьйлеген Ногай район Савытлы куьшлер эм ыхтыяр саклавшы органларынынъ ветеранлар советининъ председатели Акманбет Сангишиев, район Хатын-кызлар советининъ председатели Асият Манкаева эм Терекли-Мектеб авыл администрациясынынъ аькимбасы Зейдулла Аджибайрамов та айттылар. Соны ман бирге олар аьлиги яс несиллерге элимиздинъ тарихининъ сондай кайгылы бетлерин дайым да эсте тутпага эм сондай намартлыкка карсы турмага шакырув эттилер.
Эстеликли шарада терроризм бизге кайдай йойымлар ман казалар аькелетаганы акында ятлавларды А.Джанибеков эм Кадрия атындагы мектеблердинъ окувшылары Мамат Ахмаджанов пан Нурият Багомаева яттан окыдылар.
Митинг катнасувшылары элимизде террорист ислерининъ сырагысында ян бергенлерди уьндемев такыйкасы ман эскердилер. Сонъында ерли мектеблердинъ окувшылары терроризм мен куьресуьвде макулласув белгиси эсапта бийикке шарлар йибердилер.
М.Ханов
