Дагестан Республикасынынъ Оькиметининъ санитар-эпидемиялык комиссиясы быйылдынъ биринши ярым йылы ишинде республика еринде оьткир юкпалы шек маразы ман авырыйтаганлар саны оьсуьвин белгилеген.

Республикада авырыганлар саны оьткен йылдынъ бу заманына коьре быйыл 17,8 процентке арткан. ДР Роспотребнадзор управлениесининъ билдируьвлери бойынша быйылдынъ 1-нши шилле айыннан 14-нши шилле айы ишинде айырым ерлерде оьткир юкпалы шек авырувларынынъ оьсуьви эсапка алынган. Айтпага, Хасавюрт районында сондай авырувлар 57 процентке (былтыр 40 кере болган болса, быйыл 63 кере), Хасавюрт калада – 19,5 процентке (былтыр 41, быйыл – 49 кере), Каякент районында – 3,4 кере (былтыр 13, быйыл – 44 кере), сонынъ ишинде 54,5 проценти (24 ис) Сагаси-Дейбук авылында эсапка алынган, Дербентте – 1,5 кере (былтыр 13, быйыл 39 кере), Леваша районында – 30,7 процентке (былтыр 13, быйыл – 30 кере), Избербашта – 1,5 кере (былтыр 16, быйыл – 24 кере), Кизляр районында – 2,5 кере (былтыр 13, быйыл 24 кере), Кизлярда – 1,8 кере арткан.

Быйылдынъ 1-нши шилле айыннан 14-нши шилле айы ишинде Дагестан Республикасы бойынша Роспотребнадзор управлениесининъ территориаллык боьликлери артезиан сувынынъ 228 туьрлисин алып тергеген, солардынъ ишиннен 49 проценти (былтыр 21,5 процент эди) микробиологиялык коьрсетимлерине келис-пейди деп белгиленген.
Республикада сув ман канагатланув аьллерининъ осаллыгы, солай ок Дагестан Республикасы бойынша юкпалы авырувлардынъ яйылувынынъ алдын шалув ман байланыста регионда туьзилген эпидемиялык аьлди ийгилендируьв ниетте ДР Оькиметининъ санитар-эпидемиялык комиссиясы тийисли карарлар кабыл эткен.