Ногай районынынъ Терекли-Мектеб авылынынъ А.Джанибеков атындагы орта мектебинде «Оьз билиминъ мен боьлис. Янъы горизонтлар» деп аталган акция эсабында 9-ншы «а» классынынъ окувшылары Ногай район администрациясынынъ Ямагат палатасынынъ председатели, ФСБ полковниги, ФСБ ветераны Эльмурза Саитов пан йолыгыс оьткергенлер.

«Оьз билиминъ мен боьлис. Янъы горизонтлар» деп аталган акциядынъ бас ниети – окувшыларды бизим элимиз, сонынъ аьлиги заман кесегиндеги етимислери, оьрленуьв йоллары акында тарих акыйкатлыгы ман, аьр аьдемнинъ байыр эм кеспи оьрленуьвиндеги амаллары ман таныстырув, солай ок ис аьрекеттинъ туьрли тармакларынынъ пайдалы билимлери мен боьлисуьв.
Эльмурза Союнович пен йолыгыс хабарласув кебинде оьтти. Окувшылар ога туьрли соравлар бердилер, ФСБ куллыкшысынынъ иси акында кызыксындылар.
Оьз ягыннан Эльмурза Саитов окувшыларга оьзининъ мектеб, студент йыллары, куллыгы, аьлиги заманда болып турган оьзгерислер акында хабарлады.
Окувшылар Эльмурза Союновичтинъ кенъеслерин, ойларын эс берип тынъладылар. Энъ де маьнелиси, олар балалар уьшин окув ол бас куллык экенин, тувган тилди уьйренуьв, ясуьйкенлерди сыйлав, берк нызам, тийисли йорык тутув, таза намыслы болув керегин анъладылар. Тек соларга етисуьв уьшин балалар бас деп мектебте ийги билим алмага керегин белгиледи Эльмурза Саитов.
Авыл хабаршы.
Суьвретте: Э.Саитов А.Джанибеков атындагы мектебтинъ окувшылары ман йолыгыста.