Ногай район администрациясынынъ кенъеслер залында район еринде коронавирус юкпалы маразынынъ яйылувын иркуьв бойынша оперативли штабынынъ кезекли йыйыны оьткерилген.
Йыйынды район администрациясынынъ аькимбасы, Оперативли штабынынъ етекшиси Мухтарбий Аджеков ашты эм юритти. Шарада онынъ орынбасарлары Баймагомед Ярлыкапов эм Хамидулла Саитов, Ногай ЦРБ бас врачынынъ орынбасары Зульфия Шугаипова, врач-эпидемиолог Аклима Нургушиева, бир неше ерли организацияларынынъ эм учреждениелерининъ етекшилери катнастылар.
ЦРБ бас врачынынъ орынбасарынынъ билдируьвлерине коьре, коронавирус юкпалы маразы ман байланыслы аьллер республика, сонынъ санында район ерлеринде эндиги де авыр болып калады. Быйылдынъ 4-нши августына район больницасында 60 орын аьзирленген эди, баьриси стационарда 62 авырувлы аьдемлер болган, амбулаторлык авырувлылар саны – 87.
Зульфия Шугаиповадынъ айтувы ман, пандемия басланатаган 2020-ншы йылдынъ язлыгыннан алып, оьткен йыл район бойынша баьриси юкпалы мараздан 14 аьдем оьлген. Солардынъ 9-ы – COVID-19, калганлары –пневмониядан. Быйылгы 2021-нши йылдынъ январиннен алып буьгуьнге дейим районда 9 аьдем оьлген. Статистика билдируьвлерине коьре деп белгилеген Зульфия Шугаипова, аьлиги заманда реанимацияда авыр ятак авырувлылар йок болувына да карамастан, мараздынъ быйыл авыр аьллерде оьтуьви белгиленген. Клиника аьллеринде авырув 3-4 куьн ишинде оьрленеди, инкубационлык заман болжалы былтыргыга коьре кыскарган. Авырувлылардынъ коьбиси Терекли-Мектеб авылыннан, солай ок Куьнбатар, эндигиси Нариман эм Червленные Буруны авылларында да мараздынъ ошагы барлыгы аянланган.
Бас врачтынъ орынбасары, солай ок район бойынша коронавируска карсы вакцинациядынъ биринши кезегин 3853 аьдем оьткенин билдирди. Ызгы куьнлерде ДР Роспотребнадзордынъ токтасы ман байланыста вакцина эттиретаган аьдемлер саны оьскени сезиледи. Болса да, аьли баьриси де соны анъламайды. Айтпага, район предпринимательлери арасында оьз куллыкшылары ман бирге келип прививка эттиретаганлар да бар. Мысалы, «Батыр» хозяйстволык товарлар туькенининъ иеси Батырхан Бийболатов оьз куллыкшылары ман келип 1-нши вакцинацияды эттирдилер. Тек соны ман бирге, деп белгиледи Зульфия Шугаипова, вакцинация акында анълатув этпеге деп келген медиклерди оьз туькенлериннен шыгаратаган предпринимательлер де йок тувыл. Район аькимбасы бу ерде сондай предпринимательлердинъ туькенлерин олай болса ябув керек деди.
Аьлди онынъ орынбасары Баймагомед Ярлыкапов анълатты. Ол район ЦРБ медиклерине вакцинацияды оьтпеге суьймейтаган предпринимательлердинъ списогын беринъиз деп билдирди. «Сол списокты биз ДР Роспотребнадзорына йиберип, соннан айырым савда пунктларды ябувга официаллык ыхтыяр алган сонъ, полиция куллыкшылары ман бирге соларды ябармыз», – деди Баймагомед Ярлыкапов.
Район Оперативли штабынынъ етекшиси район администрациясынынъ «Яслык» яслар орталыгынынъ басшысы Нурсултан Арслановка район орталыгынынъ халк коьлем болатаган ерлерге коронавируска карсы вакцинацияды оьтпеге шакыратаган бир неше баннерлер аьзирлеп илмеге тапшырды. Ол, солай ок район Имамлар советининъ председатели этилинип янъыларда беркитилген Али Арслановка авыл ерлеринде оьли мен байланыслы шараларга аьдемлер аз йыйылмага кереги акында халк арасында анълатув куллык юритпеге тилек этти. Бу ерде Ногай ЦРБ врач-эпидемиологы Аклима Нургушиева да район еринде тойлар аз санлы аьдемлердинъ катнасувы ман ашык авада оьткерилмеге керек деди.
Йыйынды тамамлай келип, Мухтарбий Аджеков район бойынша коронавирус пан байланыслы аьллер онъайлы тувыл экенин белгиледи. Онынъ айтувы ман, 62 авырувлы аьдем район уьшин коьп. Тек янъыларда тагы да эки район яшавшысы топырак болды. Сондай аьллерде бизге парахатланмага аьли де эрте, авырув ман байланыста киргистилген баьри де тыювларды тутпага эм вакцинацияды оьтпеге керек болады.
М.Ханов.
