Согыс спецоперация катнасувшылары оьз Эли уьшин куьреседилер, аьскер борышларын сыйы ман толтырадылар. Олар Донбасстынъ кардаш халкын коршалайдылар, Луганск эм Донецк Халк Республикаларынынъ ерлериннен неонацизмди тамыры ман тайдырув уьшин оьз куьшлерин, савлыгын аямайдылар. Аьскер аьрекетшилерине, мобилизация бойынша шакыртылганларга эм оьз эрки мен согыс спецоперациясы болып турган ерге кеткенлерге душпанга карсы турмага уьйинде оларды куьткен кардаш-тувганларынынъ суьйими коьмек этеди. Урыслар озып турган ерде аьдемлердинъ яшавлары такыйка сайын сынавга салынады, соларга ювыкларынынъ коьтергишлеви бек керекли эм маьнели. Патшалык яктан коьтергишлевдинъ де олар уьшин уьйкен маьнелиги бар. СВО катнасувшыларынынъ аналары, хатынлары эм балалары акында патшалык каьр шексе, йигитлеримизге аьскер борышларын толтырмага тыныш болады.
Ногай районында да, савлай элимиздегиндей болып, согыс спецоперация катнасувшыларынынъ аьеллерине коьмек этилинеди. Муниципалитетте мобилизация бойынша СВО озып турган ерге шакыртылганлардынъ, оьз эрки мен кардаш Донбасс халкын коршалавга кеткенлердинъ аьеллерине ярдам этуьв бойынша Штабы аьрекетлейди. Ол «Баьримиз де бирге» деген республикалык акция бойынша туьзилген. Керексинген аьеллерге карыж яктан да колтыклав этилинеди. Солай ок Ногай районында СВО катнасувшыларынынъ аналары, хатынлары оьрметленеди эм сыйланады, олардынъ балаларына туьрли шаралар эм экскурсиялар уйгынланады.
СВО катнасувшысы Аджинияз Акимовтынъ хатыны Альфия Амирхановна – Кадрия атындагы мектебининъ етекшиси Ногай район администрациясы ягыннан этилинген коьмек эм коьтергишлев уьшин оьз разылыгын билдиреди.
– Ногай район администрациясына, район аькимбасы Джамалутдин Эсиргеповка, Район Депутатлар Йыйынынынъ Председатели Рустам Байманбетовка, Ногай район администрация ислери мен етекшилевши Насипхан Джумаевага, район Хатын-кызлар Советининъ председатели, ДР Ямагат палатасынынъ агзасы Асият Манкаевага уьйкен разылыгымды билдирмеге суьемен. Бу аьдемлер бизди, балаларымызды оьзлерининъ суьйими эм каьр шегуьви мен ораганлар. Оьзининъ коьрими мен Джамалутдин Эсиргепов соьзлерде тувыл, шынты аьрекети мен патшалыгымыз бу куьнлерде согыс спецоперациясында катнаскан куьеви яде увылы болган аьеллерге коьмек этетаганын коьрсетти. Сол коьтергишлев бизге тоьмен коьнъилликке коьмилип кетпеге бермейди эм сабыр аьлде аьзиз аьдемлеримиздинъ уьйге кайтувын куьтпеге ярдам этеди. Боьтен де йылы соьз бен этилинген колтыклав куьш береди. Аьр бир байрамда олар бизге эс эм сый этедилер. СВО катнасувшысы болган аьр бир аьел Ногай районынынъ администрациясынынъ коьтергишлевин баалайды эм оьз разылыгын билдиреди. Коьп заманга балалардынъ эсинде район администрациясынынъ коьмеги мен озган 2022-нши йылдынъ язында Сулак каньонына кыдырып барганлары сакланар. Бизим балалар бек кувандылар сондай ерде болганына. Балаларды коршалав халклар ара куьнинде бизим саьбийлерге Ногай патшалык драмалык театрынынъ артистлери «Буратино» эртегисин коьрсеттилер, – дейди Альфия Акимова.
Аджинияз Акимов мобилизация акында билдирилгенше дейим, Терекли-Мектеб авылыннан оьз эрки мен Донбасстынъ кардаш халкын коршаламага кеткенлердинъ энъ де бириншиси болады. Борышларды толтырувда эрклик коьрсеткени уьшин Аджинияз Акимов Суворовтынъ медали мен савгаланган, ога аьли де бир савга тапшырылаяк деп билдирилген.
СВО катнасувшысына, бизим эркли ердесимиз Аджинияз Акимовка биз тез арада Енъуьв мен уьйине, хатыны эм балаларына кайтканын йораймыз. Онынъ хатыны Альфия Акимовага – куьш эм сабырлык.
Нурият Кожаева.
Суьвретте: Аджинияз эм Альфия Акимовлар кишкей увылы Сулейман ман.