Социаллык газификация программасы ишинде ветеранларга, сакатларга, коьп балалы аьеллерге, ялгыз пенсионерлерге, оьзлерининъ байыр участокларынынъ ишине коьгилдим отын киргизуьвге эм газ алатын алмага оькимет яктан коьмек этилинеди.

Сол буйымды толтырар уьшин ер участогына бир кере берилетаган акша оьлшеми 90 мынъ маьнет акшадан артпага керек тувыл.
Дагестан Республикасынынъ Оькиметининъ Председатели Абдулмуслим Абдулмуслимов белгилегенлей, социаллык газификация программасына коьре, керексингенлерге ярдамга деп белгиленген акша оьлшеми бек салдарлы коьмек болады. Солай ок, онынъ белгилевине коьре, бизим республикамыздынъ авыл ерлеринде Россия Федерациясынынъ Президенти Владимир Путиннинъ буйырыгы бойынша ис юреди. Дагестан Республикасында 2022-нши йылдынъ ызына дейим баьри авыллары да толысынша газификацияланмага керек.
– Бизде социаллык газификация программасына кирип болмайтаганлар да бар. Олай дегенимиз, коьбиси байыр уьйлердинъ тийисли документлери йок, уьйлер закон бойынша яшайтаган аьдемлердинъ уьстилеринде тувыл. Соны ман байланыслы болып, коьп маьселелер тувадылар. Сондай кыйынлы аьллерге калмас уьшин, республикадынъ яшавшыларын, социаллык газификация программасы ишинде уьйлеринъизге коьгилдим отын еткерер уьшин, баьри тийисли документлеринъиз болсын, – дейди Абдулмуслим Абдулмуслимов.
Белгилеп озайык, баьриси Дагестан Республикасында социаллык газификация программасына кирер уьшин 2017 аьризе берилген. Сол программа ишинде 100 уьйге коьгилдим оты еткерилген.