Мухтарбий Аджеков, «Ногайский район» МР администрациясынынъ аькимбасы: «Оьткен юма ишинде Дагестан Республикасынынъ Аькимбасынынъ куллыгын кесек заманга юритуьвши Сергей Меликов Сырт регион бойынша оьзининъ ис визити мен Ногай районында да болып кетти. Ол Ставрополь крайы ман япсарланып орынласкан Орта-Тоьбе авылында 200 окувшылар орынларга эсапланып салынган янъы мектебте болып, окытувшылар эм окувшылар ман йолыгысты. Солай ок ол район орталыгы Терекли-Мектебте район яшавшылары ман йолыгысты, Кадрия атындагы орта мектебинде эм бир неше маданият учреждениелеринде болып кетти.
Дагестан етекшиси Сергей Меликовтынъ район ерине келуьви онынъ яшавшыларынынъ юреклеринде ийги ыз калдырды.
Сергей Меликов, Кадрия атындагы мектебте болып, эндиги йыл 700 окувшыларга эсапланып янъы мектебтинъ курылысына кирисуьв уьшин проект-сметалык документациясын быйыл ок аьзирлемеге тапшырды. Аьли бу юз йылдан артык заманда салынган кишкей мектеб меканында 500-ден артык балалар окыйдылар.
Бу янъылык, оьзек те, окытувшыларды, ата- аналарды эм окувшыларды суьйинтпей болмады.
Белгилев керек, солай ок район ерлерин кумлак басатаганы, коьшпели мал соравлары ман байланыслы маьселелер де коьтерилди. Ерлерди кумлак басувы соравлары федераллык орталыгы ман шешилетаганы, а коьшпели мал маьселеси аян аьлде республикалык парламентининъ янъы сырасынынъ катнасувы ман ойласувы токтастырылганы белгили болды.
Солай ок Дагестан Аькимбасы КПСС райкомынынъ алдынгы меканын карап шыкты. Бу меканды кайбир республикалык эм район организациялар керексинуьви уьшин ярастырмага болады. Бу яктан да бизди анълап, Сергей Алимович бу соравды шешуьв бойынша тапшырмалар берди.
Мен Ногай районынынъ яшавшылары атыннан Дагестан Республика Аькимбасы Сергей Алимовичке, заман тавып, 40 градус иссиликке карамастан, бизим яшавшылар яшавы акында билуьв ниетте келгени уьшин уьйкен разылыгымды билдиремен. Дагестан Республика Аькимбасы ман аьллескен баьри де онынъ юрек ашыклыгын эм аьдемлердинъ маьселелерине эс каратып болувлыгын белгиледилер».
Любовь Уразаева, «Шоьл тавысы» республикалык газетасынынъ яваплы секретари: «Дагестан Республикасынынъ Аькимбасынынъ куллыгын кесек заманга юритуьвши Сергей Меликов Ногай районында муниципалитет оьрленуьвининъ социал-экономикалык маьселелерин ойласув мырат пан болып кетти. Ол ерли яшавшылар ман йолыгысты, оны ман аьллескеннинъ аьрисининъ маьселесине кирисип эс караткан. Солай ок ол бизим ерли редакция меканына да кирди, янъыларда ол республика етекшилевининъ демевлиги мен ярастырылганын коьрди, быйыл «Шоьл тавысы» газетасынынъ 90 йыллыгына бизим куллыкшылар штатын кенъейтпеге болаяк ниетин билдирди.
