Ногай район администрациясынынъ кезекли аппарат йыйынында район яшавынынъ аьлиги замандагы бир неше маьнели соравлары ортага салынып ойласылды.
Йыйынды район аькимбасы Мухтарбий Аджеков ашты эм юритти. Онынъ айтувы ман, янъыларда «Газпром» компаниясынынъ ваькиллери тезден бизим районга келеегин билдиргенлер. Келеяткан юмадан алып аьли де газ еткерилмеген «село Червленные Буруны» СП МО сырасына киретаган уьш те фермаларга карап газопроводтынъ курылыс маршруты салынып басланаяк. Куьнбатар, Бораншы авылларында газификациялав ислери басланган. Солай ок Уьйсалган авылына карап та газопроводты тартув маршруты ойласылады.
Аджековтынъ соьзине коьре, элде туьзилген авыр аьллерге карамастан, аьли уьшин республикада быйылга деп белгиленген проектлер мен программаларды яшавга шыгарувга буршав этетатаган зат йок.
– Район администрациясы бизде йыллап йыйналган бир неше маьселелерди шешуьв уьшин айырым куллыкларды оьткермеге деп керекли карыжлар табар деп сендиремен. Айтпага, бизди коьптен кыйнайтаган район орталыгындагы кокыс полигонын тийисли кебине келтиреекпиз. Солай ок, 2,5 гектар оьлшеми болган янъы район паркына тереклер олтыртылаяк, районга киретаган йол янына янъы арка салынаяк эм сондай баска ислер яшавга шыгарылаяк, – деп белгиледи район етекшиси.
Муннан сонъ йыйыннынъ куьн йосыгындагы «Ногайский район» МР администрациясынынъ ер тергев бойынша боьлиги» МКУ юритетаган ис аьрекети акында» деген баслапкы соравы бойынша боьликтинъ етекшиси Алимурза Менглиязов шыгып соьйледи. Ол оьз докладында белгилеген райондагы ерлерди кулланувы, солардынъ кокыс, пленка ман батувы, отлакларда тийисли нормадан артык мал саны багылувы, авыл хозяйстволык маьнелиги болган ерлерде законсыз курылыслар юритуьв соравлары бизди коьптен кыйнайтаган эди. Эндигиси район администрациясында янъы боьлик ислеп баслаганы бу соравларды шешуьвге йол ашылганын коьрсетип туры.
Менглиязовтынъ айтувы ман, аьлиги заманда Куьнбатар авылында 300 гектар ерлерде пленка барлыгы аянланган, солардынъ 164 гектарында пленка йыйылган эм аьли де йыйылады. «Сельсовет Коктюбинский» СП МО ериндеги пленка бийлеген 250 гектардан тек 40 гектары тазаланган. Карагас авыл муниципалитетинде болса 450 гектар ерлер пленка басып ятады, солардынъ 100 гектары соннан босатылган. Орта-Тоьбе авылында пленка баскан 100 гектар эгин кырлардынъ 30 гектары йыйылган. Бу ерде йыйыннынъ катнасувшыларына пленка баскан эгин кырларынынъ суьвретлери коьрсетилди.
Тергевлердинъ сырасыгында боьлик аьли уьшин 30 материал йыйнаган, солар район эм республика прокуратураларына йиберилееклер.
Ерлерди тергев куллыгы армаган бардырылады.
– Бизге, район администрациясына, ерлерди дурыс кулланмайтаган иелерин дембисине йолыктырмага ыхтыяр берилмеген. Биз сондай тийиссизликлер акында материлларды йыйып, табиат саклав бойынша республика прокуратурасына йибереекпиз, сол материалларга коьре керекли дембиси де этилинеек, – деп беркитти Мухтарбий Аджеков.
Быйылдынъ оьткен биринши кварталынынъ ис сырагылары акында «Яслык» МЦ МКУ директорынынъ куллыгын юритуьвши Абибулла Шамбилов хабарлады.
Бизим хабаршы.
