ДР-нынъ Ногай районынынъ делегациясы Челябинск областининъ Нагайбакский районында конакта болды. Делегация сырасында – район аькимбасы Мухтарбий Аджеков, Ногай район Депутатлар Йыйынынынъ председатели Джамалутдин Эсиргепов, онынъ орынбасары Рустам Байманбетов, депутат Мурзадин Карамурзаев эм ер тергев бойынша боьлигининъ етекшиси Алимурза Менглиязов.

Узактагы Дагестаннан келген конакларды Нагайбакский районынынъ аькимбасы Иван Сурменев, Депутатлар Йыйынынынъ председатели Владимир Бурмистров, Ногайбакский районынынъ сыйлы гражданини, Челябинск областининъ муниципаллык туьзилислер Ассоциациясынынъ председатели Михаил Васильев, аькимбасынынъ социаллык соравлар бойынша орынбасары Ирина Юскина эм район администрациясынынъ маданият управлениесининъ етекшиси Елена Васильева хош коьрип алдылар.
Йолыгыс барысында муниципаллык туьзилислер ара байланыс аьрекетин юргистуьв акында Келисуьвге кол басылды. Эки яктынъ да ниети бир эди: Келисуьв тек кагытта язылып калмай, кардаш халклары ара берк дослык тутувга себеплигин тийгистсин.
Сонъ конаклар Фершампенуазский уьлке танув музейинде, Яратувшылык уьйинде болдылар. Мунда олар ногайбаклардынъ тарихи эм аьдет-йорыклары акында коьп затлар билдилер. Краеведлерге Ногай районынынъ ваькиллери ногай усталары ман этилген домбырады эм миллетлик бас кийимин савкатладылар. Нагайбакский районы ягыннан бизим делегацияга уста Владимир Деняев ясаган агаш шапшагын эм ногайбаклардынъ миллет кийими савкат эсабында тапшырылды.
Конаклар Париж уьлке танув эм Фершампенуаз авыл музейлеринде болдылар.