Саьли куьн, 4-нши октябрьде, Ногай районынынъ етекшиси Джамалутдин Эсиргепов кезекли аппарат кенъесин озгарды. Онда авыллар басшылары, кайбир республикалык эм район организациялар етекшилери, солай ок ямагат организациялар ваькиллери ортакшылык эттилер.
Кенъестинъ басында район етекшиси авыллар поселениелер аькимбасларын оьз ерлеринде толы болмаган мобилизация кампаниясын оьткеруьвге артыгы ман эс каратпага шакырды.
– Сиз оьз авылларынъызда ясуьйкенлер мен, авыл яшавшылары ман анълатув хабарласувлар юритпеге тийислисиз. Бу куьнге биз йыйылув пунктларына 21 аьдем йибергенмиз, эм мен савлай район еринде толы болмаган мобилизация кампаниясы бардырылатаганын яваплылык пан билдиремен. Толы болмаган мобилизация ман байланыста аьдемлердинъ йыйылув пунктларына кешигип келетаганы олардынъ элимиздинъ баска регионларына кетуьви мен байланыслы экенин анълайман, эм сол ерлерден де кайбиревлер шакыртылады, ама, сога карамастан, сиз, авыллар етекшилери, ясларды уьйлерине кайтарув уьшин олардынъ ата-аналары ман анълатув куллыгын юритпеге керексиз.
Соьзсиз де, бизде коьрим алгандай аьдемлер бар. Айтпага, Нариман авылыннан Абдулбариевлер аьелиннен, толы болмаган мобилизацияга яваплап, агалы-инили эки аданаслар Эл алдында оьз борышын толтырмага йолландылар. Эм буьгуьнде баска мысал: увыллары Элимизди коршалавга турган увыллары артыннан олардынъ атасы да оьз эрки мен кетпеге аьзирлигин билдирди, – деди Джамалутдин Эсиргепов, йыйылганларга соьзин каратып. Солай ок, ол белгилегенлей, районда толы болмаган мобилизация ман байланыста шакыртылганлардынъ аьеллерине ярдам этуьв пункты туьзилген, социаллык фондына организациялар коллективлери оьз эрки мен бир куьнлик кыйын акын коьширедилер.
Район етекшисининъ айтканын район Хатын-кызлар советининъ председатели Асият Манкаева яклады. Ол Донбасска кеткенлерди йылы кийимлер мен эм аптечкалар ман канагатлавды уйгынламага керегин белгиледи.
Кумлы авыл басшысы Сакинат Елманбетова мобилизация ман шакыртылган авыл яшавшысы Канат Танашевка кийимди эм аптечкады сав авыл ман бирге аьзирлегенин белгиледи.
Оьз ой-маслагатлары ман солай ок район Йыйынынынъ депутаты Рустам Адильгереев эм ямагат организациялардынъ баска ваькиллери шыгып соьйледилер.
Сол куьн кенъес катнасувшылары алдында Ногай районы бойынша «ДР-да оькимет эм муниципаллык буйымлар битируьв МФЦ» филиалынынъ етекшиси Руслан Муталимов эм Червленные Буруны авыл поселениесининъ авыл хозяйствосынынъ социал-экономикалык оьрленуьви бойынша авыл етекшисининъ орынбасары Артур Арсланов оьз докладлары ман шыгып соьйледилер (онынъ акында толы информация газетамыздынъ кезекли номерлеринде билдирилеек).
Э.КОЖАЕВА.
