Оьткен юма сонъгы куьн Ногай районынынъ баьри мектеблеринде ызгы занъ байрамы болып озды. Ол – аьр окув йылынынъ шатлыклы оьзгериси эм выпускниклерге армаганда коьтерилуьвде маьнели орын тутады.
Ногай район билимлендируьв боьлигининъ етекшиси Алтын Агаспарова белгилегенлей, быйыл 2022-нши йылда муниципалитетлер мектеблерин 107 выпускниклер окып битирдилер.
– Олардынъ артында – билимлер алувга каныгыслы аьлде енъил тувыл йол ман алдыга ымтылув, армаган яшавда пайдалы эм керекли болувга арымастай кыйын салув. Эм бу яктан оларга кыйынлары бааланып болмайтаган ата-аналар эм окытувшылар ярдам эткенлер. Алдыда бизим выпускниклерди туьрли кызыксынувларга толы эм яркын яшав куьтеди, онда оларга янъы ой-токтасларын яшавга шыгарувга йоллар ашык болсын. Аьриси, янына якын кеспиди байырлап, байыр сокпагын тапсын. Биз оларды тувган еринде янъы ой-токтаслары ман, тоьгерек якка янъы карасы ман, байыр планлары ман куьтемиз эм бу баьри затлар яшавга тезлик пен киритилеегине сенемиз. Яхшы йолга, аявлы выпускниклер! – деди Алтын Даутовна Агаспарова.
Баьри мектеблерде выпускниклерди бу куьн шатлыклы аьлде район администрация ваькиллери кутладылар. А-Х.Ш.Джанибеков атындагы Терекли-Мектеб орта мектебининъ выпускниклерин район аькимбасынынъ ис борышларын толтырувшы Хамидулла Саитов алгыслады.
– Мектебти окып битируьв – аьр аьдем яшавында маьнели япсар. Сиз, выпускниклер, баьринъиз де янъы, уьйкенлер яшавынынъ босагасында турысыз. Алдыда – кеспи сайлав эм армаганда оьз бактысын белгилев мен байланыслы яваплы шак. Бир неше йыллардан сонъ, сиз билимли, яс специалистлер болаяксыз. Сиз байыр яшав эм яратувшылык ашувларынъызды яшавга шыгараягынъызга сенемиз, а сизинъ байыр етимислеринъиз бизим районымыздынъ, элимиздинъ уьстинликлерининъ негизи болар.
Бу шатлыклы байрам оьзгериси мен сизди де, аявлы окытувшылар, ак юректен кутлаймыз. Кеспилигинъиз, яратувшылык аьлде кыйын салувынъыз, кеспинъизге алаллыгынъыз эм балаларга суьйимлигинъиз уьшин савболынъыз. Баьрисин де бу байрам куьни мен кутлаймыз, а выпускниклерге келеектеги яшавга наьсипли йолды йораймыз, – деп каратты бу шатлыклы шарада оьз соьзин йыйылганларга Хамидулла Саитов.
Э.Кожаева.
