Республика орталыгы Махачкалада уллы шаир Расул Гамзатовтынъ тувганлы 100 йыллыгына багысланып, «Я эти руки женские целую» деп, Кыскаяклылар форумы озгарылды. Оны ДР-нынъ миллет политикасы эм дин ислери бойынша министерствосынынъ колтыклавы ман Дагестаннынъ Кыскаяклылар союзы уйгынлады. Форум катнасувшылары – республикадынъ власть органларынынъ, ямагат организацияларынынъ ваькиллери, согыс спецоперациясында катнасатаган ердеслеримиздинъ аналары эм ян косаклары ортакшылык эттилер.
Шарада шыгып соьйлеген ДР-нынъ Миннац етекшиси Энрик Муслимов Дагестан Аькимбасы Сергей Меликовтынъ атыннан баьри йыйылганларды хош коьрип алды, Расул Гамзатовтынъ 100 йыллыгына багысланып шаралар тек Дагестанда тувыл, Россиядынъ бир неше регионларында да оьтетаганын белгиледи. Онынъ айтувы ман, регионларда тек ДР-нынъ Правительство ваькиллери мен 120-дан артык уьйкен оьлшемли шаралар озгарылувы планланган.
Энрик Муслимовтынъ белгилеви мен, уллы шаирдинъ яратувшылык асабалыгын бийлеген орталык темаларынынъ бириси – анага, кыскаяклыга, ян бийкеге суьйимлик сезими.
– Расул Гамзатовтынъ кыскаяклыларга, анага айырым карасы бар эди. Ана суьйимин бир зат пан авыстырып болмайды, ол – бек терен эм йылы сезим. Балага ана орынын бирев де, бир заман да авыстырып болмас. Оьз баласы акында соьз бардырылса, ана дегенге оьз мырадына етисуьвде бир законлар да, бир оравлыклар да буршавлык этпес, – деп тамамлады оьз соьзин ДР-нынъ Миннац етекшиси.
Сонъ ДР-нынъ Миллет политикасы, ямагат эм дин биригуьвлер соравлары эм парламентлер ара байланыслар бойынша комитетининъ председатели Фирудин Раджабов, Дагестаннынъ Хатын-кызлар союзынынъ председатели Интизар Мамутаева, Дагестан Аькимбасынынъ коьмекшиси Людмила Авшалумова шыгып соьйледилер.
Дагестаннынъ халк шаирининъ кызы, Дагестаннынъ П.С.Гамзатова атындагы изобразительлик саниятлар музейининъ директоры Салихат Гамзатова шара уйгынлавшыларына оьз разылыгын билдирди эм кыскаяклылар темасы атасынынъ яратувшылыгынынъ бас темаларынынъ бириси экенин белгиледи.
Шарада солай ок Дагестаннынъ Язувшылар союзынынъ председателининъ орынбасары Сувайнат Исрафилова, Россия Баьтирининъ анасы Сапижат Мазаева эм баскалар шыгып соьйледилер, Расул Гамзатовтынъ произведениелеринде ана келпетининъ туткан орыны, шаирдинъ ямагат эм элимиздинъ яшавына коскан уьлисин белгиледилер.
Бу шарада Энрик Муслимов Ногай районынынъ Хатын-кызлар советининъ председатели Асият Манкаевады (суьвретте) Дагестан Республика Аькимбасынынъ Разылык хаты ман кутлады. Биз «Шоьл тавысы» республикалык газетасынынъ эксперти Асият Манкаевады ак юректен кутлаймыз, оьзининъ ямагат аьрекетинде янъы уьстинликлерге етискенди, ден савлыкты эм наьсипти йораймыз.
