Янъыларда Дагестан Республикасынынъ Аькимбасынынъ кесек заманга куллыгын юритуьвши Сергей Меликов ЕГЭ сынавларын оьтуьвде 100 балл алган выпускниклер мен, солай ок савлайроссиялык олимпиадаларынынъ енъуьвшилери мен йолыгыс озгарды. Онлайн кебинде болган йолыгыста Сергей Меликов бу выпускниклерге эм олардынъ окытувшыларына акшалай баргы берилеегин айтты.

«Юз мынъ маьнет акшалай баргы савлайроссиялык окувшылар олимпиадасынынъ ызгы кезегининъ енъуьвшилерине, солай ок ЕГЭ сынавларын оьткенде 100 балл алган окувшыларга берилеек», – деди регион Аькимбасы йолыгыста.
Сынавларда 100 балл алган выпускниклер сырасында Ногай районынынъ мектеблерининъ выпускниклери де бар.
Алина Кусеповадынъ анасы «Шоьл тавысы» республикалык газетасынынъ корреспондентине кызы Алина бала заманнан алып орыс тилин эм адабиатын суьетаганы акында хабарлады:
– Бас деп мен ата-аналар атыннан Дагестан Аькимбасы Сергей Алимовичке бизим балалардынъ ийги сырагылы окувына йогары белги бергенине разылыгымды билдирмеге суьемен. Бу Алинадынъ биринши уьйкен акшалай баргысы, буьгуьнги йолыгыс ога аьли де бийик уьстинликлерге етиспеге демевлик этер деп сенемен, эм бу баргы кызымнынъ эсинде калаягына мен шекленмеймен.
Бу беркитилген акшалай баргы энди йыл мектебти кутараяк окувшыларга эм олардынъ окытувшыларына алдыга барувга шалыспага демевлик этер. Мен оьзим де, окытувшы болып ислегенмен, сога коьре халктынъ авызыннан тувыл, шынтылайын билемен кайдай авыр экенин окытувшыдынъ иси. Уьйкен классларда балалар шалысадылар, экзаменлер бермеге ти- йисли сабакларыннан янъы йосыклар излейдилер. Мен ойлайман, бу куьнги Дагестан Аькимбасынынъ ниети – республикадынъ келеектегисин оьрлендируьв эм колтыклав, – деди Алина Кусеповадынъ анасы.
Суьвретте: Г.Кусепова кызы ман.