Оьткен юма сонъгы куьн Дагестан Республикасына «Спутник V» маркалы «ГамКовидВак» коронавируслы маразына карсы 11700 вакцина аькелинген. Вакцинадынъ бу кеби Россия элиннен баска шет эллерде де тийисли тергевлерди оьткен эм онынъ пайдасын биз аьли юрип турган прививка кампаниясында коьрип турымыз.

Аьлиги заманларда илми тергевлерге коьре, бу вакцинадынъ ийгилиги коьринеди. Вакцинады алган аьдемлердинъ 97 процентинде авырувга карсы антителолар бары аянланган, олар авырувды да алмайдылар. 2021-нши йылдынъ тамбыз айынынъ 15-нши куьнине Дагестан Республикасында 112629 аьдем коронавируслы авырувга карсы иммунизацияды оьткен, Ногай районында болса, 2000-га ювык аьдемлер вакцинадынъ биринши кезегин оьткен, 1101 аьдем экинши кезегин де алган.

Республика бойынша коронавируслы эм внебольничная пневмония ман зарарланган аьдемлер саны оьсип барады, бу куьнлерге 1341 аьдем стационарда эмленеди, солардынъ 110 аьдеми реанимация боьлигинде эмленедилер, 35 авырувлы аьдемлер аппарат аркалы тыныс аладылар.

Бу куьнлерде республика бойынша коронавируслы маразлыларды эмлев уьшин ятар орынлар саны оьстирилген – аьли уьшин 1459 болады.