Янъыларда Махачкалада «Дагестан Республика еринде янъы коронавируслы инфекциясынынъ яйылувынынъ алдын шалув бойынша шаралар акында» ДР Аькимбасынынъ Указынынъ талаплавларын толтырув ниетте рейд шаралар озгарылды. Солардынъ барысында кайбир ерлерде талаплавлар толысынша толтырылмайтаганы аянланды.

Соны ман байланыста оьз ойы ман «Шоьл тавысы» газетасынынъ бас редакторы Эльмира Кожаева боьлисти. «Аьли ямагат ерлерде, коьликлерде QR-кодларды тергев бойынша эрислесуьвлер юреди. Госдума коьликте сол яктан тергев юритпеге керегин якламады. Ама пандемия заманында оннан сакланув уьшин бизге законга яде баска правовой актлар ярдамы ман шаралар коьрмеге керек пе? Кайда бизим бу яктан акыллылыгымыз? Меним ойыма коьре, QR-кодларды коронавирус маразын яйылув мезгилинде баьри ерлерде де тергемеге тийисли. Ол бек керек бизге, бизим кавыфсызлыгымыз уьшин. Янъыларда ДР Аькимбасынынъ «Дагестан Республика еринде янъы коронавируслы инфекциясынынъ яйылувынынъ алдын шалув бойынша шаралар акында» деген Указы шыкты. Неге савда орталыклары, общепит эм баска организациялар оны толтырмайдылар? Эгер баьри де Указдынъ, Роспотребнадзордынъ, баска кабыл этилинип алынган актлардынъ талаплавларын толтырсалар, соны ман байланыста рейдлер озгарылмас эди. Ама олар толысынша толтырылмаганга, рейдлер озгарылувы бардырылаяк», – деди ол.