Янъыларда, 1-3-нши навруз куьнлеринде, РФ Федерация Советинде ДАССР курылганлы 100 йыллыгына багысланган Дагестан куьнлери болып оьттилер. Сол куьнлерде РФ Федерация Советининъ комитетлерининъ йыйынларында республикадынъ социал-экономикалык оьрленуьви уьшин маьнели соравлар ойласылып каралган эм тийисли карарлар алынган.
Солардынъ бир нешевлери акында ДР Халк Йыйынынынъ депутаты, сонынъ Курылыс, турак уьй-коммуналлык хозяйствосы, коьлик эм байланыс бойынша комитетининъ председатели Мурат Мамаев оьз ойын билдирген.
Ол Москвадагы шаралар йогары дережеде оьткенин эм солар регионнынъ армаган оьрленуьвине оьз уьлисин косаягы акында айтып белгилеген.
– Дагестан Аькимбасынынъ куллыгын юритуьвши Сергей Алимович Меликов бир неше авыр соравларды федераллык оьлшеминде коьтермеге амал тапты эм эндиги солардынъ шешилуьви эректе тувыл. Ювык арада Махачкала эм Дербент калаларды айланып оьтетаган йоллардынъ курылысы басланаяк, йыллап орыныннан козгалмайтаган сув ман канагатланув соравлары да шешилеек. Ойлап каранъыз, тек бир Махачкаладагы сувды йиберуьв тармагын кайтадан тургызувга эм ярастырувга деп федераллык орталыгы 30 миллиард маьнет акша шыгармага ниетленеди. Бу зат Москвадынъ республикамыздынъ уьйкен объектлерине, социал-экономикалык оьрленуьвине заьлимдей карыжлар йибермеге аян ымтылысы бар экенин шайытлайды. Солай ок Махачкаладынъ аэропортында да самолетлар уьшин янъы ушув-конув йолларын курув ислери армаган бардырылаяк.
Мени, республикада яшайтаган ногай халкы атыннан сайланган депутатты, боьтен де бек Кизляр отлакларында ерлердинъ кумланувы ман куьрес юритуьв бойынша федераллык программасынынъ проекти туьзилееги суьйинтеди. Сол Кизляр отлаклары деп айтылган ерлер эсабына Ногай районынынъ кырлары да киредилер. Мен тезден оьз сайлавшыларым ман йолыгыс оьткермеге эм оларга РФ Федерация Советинде Дагестан куьн- леринде республика етекшилерининъ етискен етимислери акында хабарламага ниетленемен. Халк сонынъ акында тек коьлем информация амаллары аркасы ман да тувыл, ама ол оьзи республика парламентине сайлаган бизден, оьз депутатларыннан, билмеге тийисли, – деген ДР Халк Йыйынынынъ депутаты Мурат Мамаев.
