Кырк кийик айынынъ 23-27-нши куьнлеринде Донецк эм Луганск халк республикаларында, солай ок Запорожский эм Херсон областьлеринде Россия сырасына кируьв акында референдумлар оьтти. Тавыс беруьв сырагылары бойынша бу регионлардынъ яшавшылары бизим элимиздинъ сырасына кируьвди сайладылар.
Россия Президенти Владимир Путин Кремльде Георгиевский залда янъы субъектлерди Россия сырасына киргистуьв акында соьйлесуьвлерге кол басув бойынша шыгып соьйледи. Сонъында элимиздинъ басшысы эм янъы субъектлердинъ аькимбаслары соьйлесуьвлерге кол бастылар. Сол шарада ДНР аькимбасы Денис Пушилин, ЛНР аькимбасы Леонид Пасечник, Запорожский областининъ аькимбасы Евгений Балицкий, Херсон областининъ аькимбасы Владимир Сальдо катнастылар.
Биз, Россия яшавшылары, тарихли оьзгеристинъ шайытлары болдык. Юрегимиз телезип, биз тавыс беруьвдинъ сырагыларын карадык, эм коьзяслар ман кайтип 4 субъектлердинъ аькимбаслары соьйлесуьвлерге кол басканын коьрдик. Оларга эм баьримизге де бу куьн – маьнели эм суьйинишли. Россия гражданларына, Донецк эм Луганск халк республикаларынынъ, солай ок Запорожский эм Херсон областьлерининъ яшавшыларына, Госдумадынъ депутатларына, Россия Федерациясынынъ сенаторларына каратылган соьзинде Владимир Путин референдумнынъ сырагылары – миллионлаган яшавшылардынъ сайлавы, олардынъ тарих бирлигинде негизленген ыхтыяры экенин белгиледи. Сол бирлик уьшин бизим ата-бабалар яшавларын курманлык эткенлер.
8 йыл узагында Донецк эм Луганск халк республикаларынынъ, Запорожский эм Херсон областьлерининъ яшавшылары Киев режиминнен корлав, геноцид, ашлык шыдаганлар, оларга орыс тилинде соьйлемеге бермегенлер, яслардынъ басларында, юреклеринде йыллап Россияга суьймесликти эндиргенлер. Буьгуьнлерде тагы да бир кере нацистлердинъ кир ойлары, ниетлери толмаганын коьрип турымыз, бу ерлердинъ яшавшылары оьзлерининъ тарих Аталыгына кайттылар, олардынъ ойлары да, юреклери де – Россияда. Бизим Президентимиз айтканлай, бойсынмаган, буьгилмеген халк оьз соьзин айтты. Олар сайлавын эттилер – оьз халкы ман бирге болмага.
Куьнбатар эллери россиянлылардынъ эрклигин, йигерлигин бир де бузып болмаяклар. Биз оьз Президентимизди коьтергишлемеге керекпиз, ол алып бараяткан йол элимиздинъ бузылмаслыгына, Россия яшавшыларынынъ кавыфсызлыгын аьжетсизлевге каратылган, ол – дурыс йол. Биз Донецк эм Луганск халк республикаларынынъ, Запорожский эм Херсон областьлерининъ яшавшыларын да коьтергишлемеге керекпиз, олардынъ баьтирлиги – баьримизге де коьрим, кайтип корласа да, олар Аталыгын, Россияды сатпадылар, ВСУ атысларына да карамастан, референдумга келип, оьз сайлавын эттилер. Тек Россия сырасында олар тынышлы келеектегисин коьредилер. Биз де балаларымыздынъ, немерелеримиздинъ келеектегисин тынышлы Россияда коьремиз. Буьгуьнлерде кайбиримизге де шакырув Россия Президенти Владимир Путиннинъ соьзлери болады: «Бизим артымызда – Акыйкат! Бизим артымызда – Россия!».
Украина ерин нацистлерден босатув уьшин кеткен ясларга таза аспан эм уьйге тез арада кайтканларын сагынаман.
Г.Бекмуратова
