Россия Президенти Владимир Путин Украина еринде туьзилген аьллер мен байланыста элимиздинъ яшавшыларына каратылган шакырувында Россиядынъ Савытлы куьшлер сырасында аьскерлик борышын толтырып, айырым аьскерлик-эсаплав кеспилери эм тийисли сулып алган гражданлар арасында толы болмаган мобилизация акында билдирген. Сол шакырувында ол толы болмаган мобилизация акында шара Россияды, онынъ бийлеген ерин эм суверенитетин коршалав эм россия халкынынъ кавыфсызлыгын канагатлав уьшин алынганын белгилеген.
Эске салайык, Россия Донбасстынъ тынышлыкта яшаган халкын коршалав бойынша спецоперация озгарув акында билдирген. Ол регионда февраль айынынъ ортасында туьзилген аьллер мен байланыста басланган. Сол заман ДНР эм ЛНР украин аьскерлери ягыннан атыс-урыслар тез-тез оьткерилетаганын эм тынышлыкта яшаган яшавшыларды Россия ерине коьшируьв акында билдирдилер эм оьз бойсынмаслыгын хош коьрмеге тилек салдылар.
Толы болмаган мобилизация акында Россия Президенти Украинадынъ Херсон эм Запорожье областьлерининъ кесек заманлы администрациялары, солай ок оьз бойсынмавлыгы акында оьзлери билдирген ДНР эм ЛНР 23-27-нши сентябрь куьнлеринде бу ерлерде Россия сырасына кируьв акында сорав ман референдумлар озгарылаягы белгили болган сонъ билдирген. Россия власти бу затты хош коьрген, а Владимир Путин оьзининъ 21-нши сентябрьде гражданларга каратылган шакырувында бу белгиленген референдумлар озгарувдынъ кавыфсызлыгын канагатлав уьшин Россия эли колыннан келген баьри затты этееги акында билдирген. Россия Президенти Россия оьзин коршалав уьшин баьри амалларды кулланаяк деп билдируьв эткен.
Россия Федерациясынынъ Государстволык Думасы бир тавыстан 2-нши эм 3-нши окувында Уголовлык кодексине «мобилизация», «военное положение», «военное время», «вооруженный конфликт» деген анъламларды киритуьв акында законопроектти кабыл этип алган. Бу киритилген туьрленислерге коьре аьскерлик борышты толтырувдан бас акашкан яде оьз эрки мен есирге берилсе, аьдем – 10 йылга дейим, а согыс юритилуьв заманында законга карсы аьрекетлик юритетаганлар 15 йылга дейим эркинлигин йоядылар.
Л.Уразаева,
Россия Журналистлер
союзынынъ агзасы.