Аьлиги заманда россия аьскерлери мен Украинада юритилип турган айырым аьскершилик операциясы акында оьз ойын «Справедливая Россия» партиясынынъ ерли Ногай боьлигининъ председатели Рашид Отарбаев айтып билдирген.

– Дурысын айтканда, согысты бирев де суьймейди. Болса да уьйкен политикада бирерде сондай аьллер болып алады, соларды тынышлык йорыгы ман шешип болмагандай. Бу ерде сондай туьйинди кылыш пан шавып шешпесе, болмайды.
Быйыл россия аьскерлерининъ Украина ерине кируьви эм сонда айырым операцияды озгарувы сонынъ халкы эм патшалыгы уьшин куткарылув операциясы деп атамага да болады. Сол соьз бен бу операциядынъ айырым аьскершилик операциясы деп аталувы байланыслы, неге десе сонынъ бас ниети – Украинадынъ халкын, авыл-калаларын аман калдырув. Мунда украин аьскерлерине де, эгер олар савытын тасласа, аман-эсен шыгып кетпеге деп айырым йол туьзиледи.
Сав дуныядынъ коьзи алдында 8 йыл узагында Украина оьз еринде бир затка да куьнали тувыл аьдемлерди: балаларды, кыскаяклыларды, картларды эш бир дембисиз оьлтирип турганда, ким болса да бирев бу геноцидти токтатпага керек болады. Куьнбатар эллери соны бир де токтатпаяклар, кене де олар украин аьскерлерине согыс савытын берип, сондай кыянатлыкты оьшиктиредилер. Куьнбатар эллери яктан Франция ман Германия Украинады Минскте туьзилген келисуьвлерди толтыртпага борышлы боладылар, ама олар соларды этпейдилер. Сонынъ уьшин, дуныядагы баьри де таза намыслы аьдемлер Россия Президентининъ, Савытлы куьшлерининъ аьрекети бас деп савыт-садактан, нацистлерден эм корлыктан эркин болган янъы Украинады туьзуьв болады деп санайдылар, – деген газетамыздынъ хабаршысына Рашид Отарбаев.