Быйыл 1-нши шилле айында Россия Федерациясынынъ Конституциясына туьрленислер киргистуьв бойынша юритилген савлайроссиялык тавыслав савлык саклав яктан баьри де саклык амалларын тутув аьллеринде уйгынлы кепте оьткерилди.
Тавыславдынъ сырагыларына коьре Ногай районы еринде тавыслав списокларында коьрсетилген 13800 сайлавшылардан 12435-и яде 90,1 проценти катнаскан.
РФ Конституциясына туьрленислерди киргистуьв уьшин 10660 район гражданлары тавысларын бергенлер, ол сан 85,73 процент болады, туьрленислерге карсы экенин 1551 аьдем билдирген, ол сан 12,47 процентке етиседи.
Тавыславдынъ ызгы куьнине дейим, 25-30-ншы тамбыз айы куьнлеринде район ериндеги 8834 сайлавшылар тавыслаганлар, ол зат тавыслав списокларына киргистилген гражданлардынъ ортак санынынъ 64,1 проценти болады.
Дагестан Республикасы еринде тавыслав списокларына киргистилген гражданлардынъ ортак санынынъ 89,99 проценти тавыславда катнасканлар.
Россия Федерациясынынъ Конституциясына туьрленислер киргистуьвди баьриси республика бойынша 1 352 732 аьдем яде тавысларын бергенлердинъ 89,19 проценти хош коьргенлер. Туьрленислерге карсы экенин 155 290 сайлавшы яде тавыславда ортакшылык эткенлердинъ 10,24 проценти билдирген. Россия Федерациясы бойынша РФ Конституциясына туьрленислер киргистуьв мен баьриси 77,92 гражданлар макул экенин шайытлаганлар. Ногай районында ортакроссиялык тавыславды район территориаллык сайлав комиссиясы эм 16 авыл ерлериндеги 21 участок сайлав комиссиялары аьзирлегенлер эм оьткергенлер.
Савлай элимизде, республикада эм район еринде янъы коронавирус юкпалы мараз бан байланыслы эпидемиологиялык аьллерден тура тавыслав айырым саклык тутув шартларында оьткерилди.
Тавыслав оьткерилгенше райондагы ТИК эм участок сайлав комиссияларынынъ баьри агзалары да коронавирус юкпалы маразы бойынша тестирование оьттилер. Тавыславдынъ баьри де катнасувшыларынынъ эм сайлав комиссияларынынъ агзаларынынъ савлыгын канагатлав эсабында тавыслав юрип турган меканлар ишинде баьри де тийисли амаллар коьрилдилер. Сонынъ уьшин аьр бир сайлав участогы баьри де керекли байыр коршалав алатлары (маскалар, колгаплар, халатлар, коршалав шлемлери, спирт салфеткалары, дезинфекция этуьв алатлары, антисептиклер, термометрлер) мен канагатландылар.
ДР Ямагат палатасы аьр бир сайлав участогына тергевшилер йиберди.
Тавыслав юритилген заман аьсеринде законодательство ман келисли аьлде тергевди талаплайтаган шагынувлар эм тилеклер территориаллык сайлав комиссиясына туьспеди. Территориаллык сайлав комиссиясы «Ногайский район» МР администрациясына, авыл поселение администрациялары на, районнынъ баьри де организациялары эм учреждениелерине, ыхтыяр саклавшы органларына Россия Федерациясынынъ Конституциясына туьрленислер киргистуьв бойынша ортакроссиялык тавыславды аьзирлевде эм оьткеруьвде эткен ярдамлары уьшин разылыгын билдиреди. Тавыслав юрисин куьн сайын да коьлем информация амалларында язып турганлары уьшин «Шоьл тавысы» республикалык газетасынынъ бас редакторы Эльмира Кожаевга айырым разылык билдиремен.
А-М.Ганиев, Ногай район территориаллык сайлав комиссиясынынъ председатели.
