Оьткен дуьйсемби куьн Россия Федерациясынынъ Федерация Советинде «2023-нши йылга эм 2024-2025-нши йыллардынъ планлык болжалына федераллык бюджет проектининъ параметралары акында» деген сорав ойласылды.
Онда ДР Аькимбасы Сергей Меликов, ДР Халк Йыйынынынъ Председатели Заур Аскендеров, парламенттинъ бюджет, финанслар эм налоглар бойынша комитетининъ председатели Марат Ильясов ортакшылык эттилер.
Шарады РФ Федерация Советининъ Председатели Валентина Матвиенко ашты. Онынъ катнасувшылары – РФ сенаторлары, Госдума депутатлары, РФ финанслар министерствосынынъ, Счетный палатасынынъ етекшилери, РФ субъектлерининъ йогары ис орынлардагы куллыкшылары эм элимиз субъектлерининъ финанс органларынынъ етекшилери, эксперт ямагатынынъ ваькиллери.
Бу оьзгерис акында айта берип, ДР Халк Йыйынынынъ Председатели Заур Аскендеров, санкцияларга карамастан, оькиметимиз баьри социаллык борышларды толтыраягын белгиледи. Онынъ айтувы ман, РФ сырасына кирген янъы регионларды кайтадан тургызувга амаллар белгиленген, аьскерлик спецоперация катнасувшыларын, сонынъ ишинде толы болмаган мобилизация кампаниясы барысында шакыртылганлар эм олардынъ аьеллерининъ аьллерин ийгилендируьв бойынша шаралар коьрилеек, регионлардынъ бюджет ягыннан бирдей канагатлав акында сорав да коьтерилди.
– Федераллык бюджет кабыл этилип алынган сонъ, бизге уьйкен куллык юритпеге керек болады. Республика бюджетиннен сонъ муниципаллык туьзилислер оьз бюджетлерин кабыл этееклер. Депутатлар районлардынъ эм калалардынъ бюджетлерин кабыл этуьвге аьзирлик коьруьв эм алув соравларын тергеви астына алаяклар. Олар заманында алынса, муниципаллык туьзилислерининъ керексинуьвлерине эс каратылып, акша амаллары пайдасы ман шыктажланаяк, мынълаган аьдемлер керексинуьвлери де толтырылаяк, – деди З.Аскендеров.