Саьрсемби куьн Россия Президенти Владимир Путин элимиздинъ гражданларына шакырув ман шыгып соьйледи. Бу соьйлевдинъ бас темасы – Донбасста болып турган аьллер эм оны неонацистлерден босатув бойынша специальли согыс операциясынынъ барысы.

Донбасстынъ, Херсон эм Запорожский областьлерининъ яшавшылары Россия сырасына киремиз деген аваслыгын билдирдилер эм соны ман байланыста референдумлар озгарылаяк. Биз кардаш халкларымызга коьмек этпеге, Куьнбатар эллерининъ бизим элимизди йок этпеге деген нас ойларына карсы турмага керекпиз.
– Куьнбатар эллери оьз савыт-садагы этип русофобияды эткен, онлаган йыллар биле коьре Россияга суьймесликти эндирген. Энъ де баслап, Украинада, олар бу элди Россияга карсы плацдарм этпеге ниетленгенлер, украин халкын бизи мен туьйистирип, согыспага йибергенлер, – деп айтады оьз соьйлевинде президент. Бизим аьскершилер куьн сайын Донбассты нацистлерден босатадылар. Россия кайзаманда да ярдам тилегенлерге колын созган. Буьгуьнлерде де биз шетте турып болмаймыз. Президент коркытувдынъ, оьлтируьвдинъ, террордынъ политикасы куьннен-куьнге оьсетаганын белгиледи.
– Бизде ювык аьдемлеримизди оьлтирмеге бермеге ыхтыяр йок, сол ерлердинъ яшавшыларынынъ оьз бактысын сайламага суьйген ниетин биз коьтергишлевсиз калдырып болмаймыз, – деп катырып айтты Владимир Путин. Референдумлер озгармага оьз ойын билдирдилер Донбасстынъ халк республикаларынынъ парламентлери, Запорожский эм Херсон областьлерининъ администрациялары, олар Россиядан коьтергишлев эм коьмек куьтедилер. Элимиздинъ басшысы Россия яктан референдумлардынъ оьтуьвининъ кавыфсызлыгын аьжетсизлевде баьри амаллар да алынаягы акында сендирди.
Россия Президенти толы болмаган мобилизация акында айтты. Бу карар бизим элимизди коршалав уьшин, яшавшылардынъ кавыфсызлыгын канагатлав уьшин алынган. Бизим россия халкы аьр заманда да баьтирлерше Аталыкты коршалаган. Мен шекленмеймен, биз енъермиз, неге десе аьр дайым коршалавшыларымыз явды бузганлар эм енъуьв мен уьйге кайтканлар. Бизим коьпмиллетли Дагестан бириншилердинъ сырасында Аталыкты коршалавга турган эм буьгуьнлерде де меним ердеслерим йигитлерше специальли согыс операциясында катнасадылар.
– Россия гражданлары бир де шексинмесинлер, элимиздинъ территориаллык бирлиги, бизим бойсынмаслыгымыз эм эркинлигимиз канагатланаяк, – деп сендирди Россия Президенти.
Биз оьз Президентимизге сенемиз эм оны аьр дайым коьтергишлеймиз. Дуныяда тынышлык болсын, баьрисине де таза аспан йорайман.
Г.Бекмуратова,
Дагестан Республикасынынъ ат казанган маданият куллыкшысы.