Быйылдынъ 21-нши апрелинде Ногай муниципаллык районынынъ 7-нши шакырувынынъ Депутатлар йыйынынынъ 47-нши сессиясында баска туьрли соравлар ман бирге ойласувга район администрациясынынъ тувра алдында орынласкан белгили ногай шаири Кадрия атындагы парк ишиннен 200 квадратлы метр оьлшемли ер кесегин ямагат тамакланув объектининъ (дурысында, кофейня) курылысы уьшин беруьв акында сорав шыгарылган эди. Сол куьн бу сорав келеектеги сессияда ойласувга калдырылды.
Соны эситкен район ямагат организацияларынынъ, политикалык партияларынынъ ваькиллери, белгили оьнер, маданият аьрекетшилери эм муниципалитеттинъ яшавшылары кайсы паркта да тереклерден, аллеялардан, шешекейлерден, олтыралардан эм шыраклар курыкларыннан баска бир курылыс меканы да болмага керек тувыл деген ойын билдиргенлер. Навасызланган аьдемлер РФ Федераллык Йыйынынынъ Государстволык Думасынынъ депутаты, «Айык Россия» Савлайроссиялык козгалысынынъ етекшиси Султан Хамзаевке тилек пен хат язбага амалсыз болганлар.
Хаттынъ иштелигинде бу парк «Дагестан Республикасында 2019-2024-нши йылларга аьлиги заманга келисли кала аьллерин кеплендируьв» деген Дагестан Республикасынынъ патшалык программасы бойынша курылган деп язылган. «Сол оьзгерис район яшавында тарихке киргендей оьзгерис болады, неге десе район яшавшылары район орталыгында сондай парк курмага эм соны сав туьрк дуныясына, Россияга эм дуныяга белгили ногай шаири Кадриядынъ оьлимсиз эстелигине багысламага коьптен мырат эткенлер», – деп айтылады сол шакырув хатта.
Оьзининъ хатында муниципалитеттинъ яшавшылары Госдума депутатына бу соравды шешуьвге коьмек этпеге эм «йогарыда белгиленген парктынъ оьрленуьвин тергевди оьзинъизге алынъыз, неге десе Сиз бу ямагат ерди ийгилендируьвге биринши йолды салгансыз», – деп тилек эткенлер. РФ Государстволык Думасынынъ депутаты Султан Хамзаев Ногай районынынъ ямагатынынъ шакырувына тийисли эс беруьви эм анъламы ман янаскан. Оьз ягыннан ол сонда ок та муниципалитеттинъ етекшилерине элимиздинъ йогары законодательли йыйынынынъ депутаты эсабында ямагат еринде сондай тийиссизликти эттирмеекпен деген.
Онынъ язып йиберген хатына явап кеш калмай келген. Быйылдынъ 15-нши июнинде ол замандагы Ногай район аькимбасынынъ куллыгын юритуьвши Хамидулла Саитов Султан Хамзаевке «Ногайский район» МР Депутатлар йыйынынынъ депутатлары парк ишинде ер беруьв соравын ойласып караган эм соны койдырган», – деген явабын язылма кебинде берген.
Ногай районынынъ Терекли-Мектеб авылынынъ ямагат организацияларынынъ, политикалык партияларынынъ ваькиллери, маданият аьрекетшилери, Терекли-Мектеб авыл яшавшылары РФ Федераллык Йыйынынынъ Государстволык Думасынынъ депутаты, «Айык Россия» Савлайроссиялык козгалысынынъ етекшиси Султан Хамзаевке ямагаттынъ кызыксынувларын эм гражданлардынъ ыхтыярларын яклавда коьрсеткен каты гражданлык эрки, оьз депутат наказлары эм полномочиелери уьшин яваплылык тутканы, аьдемлердинъ аьлине эс бергени уьшин уьйкен разылыгын билдиредилер.
Савлайроссиялык «Кедр» козгалысынынъ Дагестан бойынша боьлигининъ председатели Балманбет Рахмедов баьри депутатлар да халктынъ тилегине аьрекетлеп эс берген Султан Хамзаевтей болмага керек деди. Ол Кадрия атындагы парктынъ бузылмаслыгын яклав ягыннан уьйкен ярдамын этти.
– Султан Султанович Ногай районынынъ яшавшыларына, олардынъ маьселелерине уьйкен маьне береди. Ол бир неше кере район гражданларын кабыл эткен. Бир кере ол бир мектеб футбол командасын коьргенде, яс футболшылардынъ кийимлерин эслеп, олардынъ баьрине де кийим алып берген эм балаларды Махачкалага шакырган. Балалар аьлиге дейим соны мутып болмайдылар.
Соны ман бирге депутат Хамзаев районда бир неше воркаутлар эм балалар майданларын курган. Онынъ районга келуьви яшавшылар уьшин уьйкен оьзгерис болады эм ога дурыслык таппай кыйналган аьр ким де йолыгыска барады. Ямагаттынъ сондай тилеклерининъ бириси Кадрия атындагы паркта басланмага ниетленген курылыс акында эди. Болса да, наьсипке, Султан Хамзаевтинъ аркасы ман бу соравды туьз шешпеге амал табылды. Эндигиси парк ерине бирев де колын созбас, неге десе соны РФ Государстволык Думасынынъ депутаты Султан Хамзаев коршалайды.
– Кадрия Темирбулатовадынъ кардаш-тувганлары эм халкымыздынъ оьнер интеллигенциясы атыннан ога юрек разылыгымызды билдиремиз. Онынъ енъил болмаган политика йолы ярык эм етимисли болсын эм биз, Дагестан халклары, Султан Хамзаевке онынъ республикамыз уьшин аьрекетинде ярдамшы болайык, – деди «Шоьл тавысы» республикалык газетасынынъ бас редакторы Эльмира Кожаева.
