Быйыл, 12-нши мартта, РФ Государстволык Думасынынъ депутаты, «Айык Россия» деген Федераллык проектининъ етекшиси Султан Хамзаев Ногай районында ис йорыгы ман конакта болып кетти.

«Бозторгай» эгинши-фермер хозяйствосында
Оьткен каты куьн, 12-нши март куьнинде, Ногай районына ис визити мен келген РФ Государстволык Думасынынъ депутаты Султан Хамзаев тери асыллав эм консервалар болдырув бойынша цехлер курылысынынъ барысын тергев уьшин «Бозторгай» КФХ-да болып кетти. Госдума депутаты ман сонда ДР-нынъ Авыл хозяйство эм азык-туьлик министри Мухтарбий Аджеков, Ногай район аькимбасы Джамалутдин Эсиргепов, муниципалитеттинъ район йыйынынынъ председатели Рустам Байманбетов эм баскалар болдылар.
Ногай районы– Дагестаннынъ малшылык тармагында оьрленген районларынынъ бириси. Буьгуьнде 370 мынъ санга еткен малды союв, мал этин саклав, бузлатув, эт продукциясын асыллав аьлиги йосыклар негизинде озгарувды талаплайтаганы акында хабарлады Султан Хамзаевке ДР-нынъ Авыл хозяйство министри Мухтарбий Аджеков.
– Буьгуьнде бизим продукция ман коьплеген регионларда, бас деп, Кара тенъиз ягаларында, Москва регионында пайдаланадылар. Бизим малшылар продукциясын сатув ман байланыслы маьселелерден тура кыйналмайдылар, неге десе оны сатып алатаган эм сонъында продукцияды армаган йиберетаган цехлер бар.
Малшылык хозяйстволарга, айырым козлайтаган койга, берилетаган продукциядынъ килограммына эсапланып патшалык ягыннан колтыклав аьрекети бардырылады, – деп белгиледи М.Аджеков.
Мухтарбий Аджеков депутатка Ногай районындагыдай цехлер республика бойынша салынатаганы, энъ уьйкени Кизилюрт районында бар экени акында хабарлады.
Ис визити барысында делегация хозяйстводынъ баьри ерин эм предприятиединъ производстволык цехлерин карап шыкты.

Батыр-Мурзада курылатаган мектеб меканында
– Аьдемлер мектеб курылысы быйыл октябрь айына кутылар деп куьтедилер. Курылыс болжалы эндигиси эки кварталга кери калады. Мунда каты тергев эм каты сорав тутылмага тийисли, баскалай йол бизде йок, – деген С.Хамзаев ООО «Пон» генераллык подрядчиги М.Магомедовка.

А.Джанибеков атындагы мектебте
РФ Государстволык Думасынынъ депутаты Султан Хамзаев Ногай районында ис визити мен келип, район орталыгы Терекли-Мектеб авылында стадион курылысы ман танысты, солай ок А.Ш.Джанибеков атындагы орта мектеби касындагы киши майданда да болды.
Белгилеп озайык, бу эки объектлер РФ Госдума депутаты Султан Хамзаевтинъ демевлиги мен курылады.
Эске салайык, А.Ш.Джанибеков атындагы Терекли-Мектеб орта мектебининъ еринде бу спорт сооружениеси 2022-нши йылда, 20-ншы ноябрьде, РФ Госдума депутаты Султан Хамзаевтинъ демевлиги мен салынып басланды. Эм мине буьгуьн балалар С.Хамзаевти суьйинишли сеслери мен тоьгерекке алдылар. Белгилейик, Султан Хамзаев, Ногай районынынъ сыйлы гражданини – бу муниципалитет еринде коьптен бери яслардынъ эм балалардынъ досы эсабында. «Айык Россия» федераллык проектининъ етекшиси эм РФ Госдума депутаты Султан Хамзаевтинъ аркасы ман Терекли-Мектеб авыл ериндеги Кадрия атындагы паркта балалар майданы эм воркаут-майданы салынды. Эм буьгуьн депутат Карагас авыл мектебининъ директорына бу яшавшылар пунктында воркаут-майданлар ерлестирмеге соьз берди. С.Хамзаевтинъ шакырувы ман балалар футбол командасы А.Алиев атындагы спорт Дворецинде болдылар. Сол куьн яс футболшылар депутат колыннан толы спорт экипировкасын алдылар. Буьгуьн балалар Султан Хамзаевке янъы киши майданда уьйренген футбол ойынынынъ сулыпларын коьрсеттилер.
Мектеб директоры Курасхан Ярикбаева окытувшылар, балалар эм олардынъ ата-аналары атыннан РФ Государстволык Думасынынъ депутаты Султан Хамзаевке киши майданнынъ курылысын бардырувына себеплик этетаганы уьшин уьйкен разылыгын билдирди.
Солай ок депутат мектебке ремонт ислер керекпе экенин билуьв уьшин мектеб ишин де карап шыкты.
«Заманлар авыр, ама биз дурыс йол ман барамыз»
Куьндизги 14 саьатте Ногай район администрациясында район активининъ эм яшавшыларынынъ РФ Госдума депутаты Султан Хамзаев пен йолыгысы болып озды.
Йолыгыста Дагестан Авыл хозяйство эм тамак-азык министри Мухтарбий Аджеков, Ногай район аькимбасы Джамалутдин Эсиргепов, район депутатлары, патшалык учреждениелер эм организациялар етекшилери, политикалык партиялар эм ямагат козгалысларынынъ ваькиллери, район яшавшылары катнастылар.
Шарады аша келип район басшысы йолыгыс сорав-явап деген хабарласув йосыгы ман оьткерилеегин билдирди.
Бу ерде биз суьйинишли хабарды билдирмеге тийисли боламыз. РФ Госдумасынынъ депутаты Султан Хамзаевте янъы коьмекшилери белгиленген.
– Мен ызгы кере районга келгенде, оьзиме ногай халкынынъ бир ваькилин ярдамшы этип аларман деп соьйлескен эдик. Болса да, биз аьли Ногай районында – Эльмира Кожаевады, Махачкалада – Султанали Шахмурадовты, Нурлан Тангатаровты, Москвада – Умар Абдулкеримовты ярдамшылар этип беркиткенмиз, – деп билдирди йыйылганларга Султан Хамзаев.
Депутат бу шара яшавшылардынъ соравлары эм маьселелери мен танысув эм «биз дурыс йол ман барамызба» деп ойласув уьшин оьткерилетаганын анълатты. Хамзаев буьгуьнлерде аьллер республикада, савлайы элимизде енъил тувыл экенин билдирди. Онынъ айтувы ман, аьлиги заманда тарих оьлшеминдеги оьзгерислер болып туры. Бизим алдымызда аян авыр борышлар турадылар. Болса да, сога карамастан, элимиздинъ эм республикамыздынъ етекшилери бас деп социал-экономикалык маьселелерди шешуьвге уьйкен маьне бередилер. Сога аян шайыт деп белгиледи депутат, Россия Президентининъ янъыларда РФ Федераллык Йыйынына каратылган Язбасынынъ яртысыннан коьбиси социаллык соравлары: мектеблер эм балалар бавларын, йоллар, спортзаллар, стадионлар эм с.б. объектлерди курувга багысланган.
Султан Хамзаев буьгуьнлерде увыллары эм эрлери специальли согыс операциясы юритилип турган ерлерде катнасувшы аьеллерге разылыгын билдирди.
«Бизим яслар сонда тагы да бир кере дагестанлылар оьз соьзине эм исине берк аьдемлер экенин шайытлап туры. Бизим коьп ердеслеримиз аьли бизим ортак Аталыгымыз – Россиядынъ суверенитетин коршалайдылар», – деп белгиледи ол.
Яшавшылардынъ соравлары эм маьселелери акында айта келип, депутат: «Аьли маьселелер коьп, заманлар авыр, ама биз дурыс йол ман барамыз», – деп белгиледи.
Республикадынъ Авыл хозяйство эм тамак-азык министри Мухтарбий Аджеков РФ Госдумасынынъ депутаты Султан Хамзаевке Ногай районына конакка келгени эм аьдемлер мен йолыгысканы уьшин оьз разылыгын билдирди. Ол районымыздынъ энъ маьнели маьселелерининъ бириси ерлердинъ кумланув соравы буьгуьнлерде федераллык оьлшеминде шешилип баслаганын йыйылганлардынъ эслерине салды. Бу соравдынъ федераллык оьлшеминде шешилуьвине Дагестан Аькимбасы Сергей Меликовтынъ етекшилиги оьз себебин эткен. «Соны ман бирге бу маьселеди йогары власть оьлшеминде шешуьвге солай ок бизим депутатымыз Султан Хамзаев те белсенли коьмегин эткен», – деп белгиледи Мухтарбий Аджеков.
Депутатка биринши болып соравын районнынъ Ямагат палатасынынъ председатели Эльмурза Саитов берди. Ол муниципалитеттинъ савлайы ямагаты атыннан Султан Хамзаевке юрек разылыгын билдирди. Онынъ айтувы ман, «Ол дайым да республикамыздынъ эм элимиздинъ баьри де оьзгерислерининъ эм маьселелерининъ ортасында турувы ман оьзгелерден баскаланады. Сонынъ уьшин биз оны не ягыннан да коьтергишлемеге эм, керек болса, якламага да керекпиз».
Э.Саитов депутатка район окувшылары уьшин ногай тилинде окув китаплерин шыгарув соравды шешуьвде коьмек эткенин тиледи. Бу тилекти Султан Хамзаев сонда ок хош коьрди эм оьз ягыннан «бу бек дурыс сорав» деп яклады. Онынъ айтувына коьре, мундай сорав республикамыздынъ баьри миллетлери уьшин де маьнели эм сога коьре Дагестан Аькимбасынынъ тапшырувы ман окувшыларга деп «Меним тувган ягым Дагестан» деп аталган окув китаби шыгувын билдирди. Соны 1-нши сентябрьде 1-нши класска баратаган баьри балалар да алаяклар.
Терекли-Мектеб авылдынъ А.Джанибеков атындагы орта мектебининъ директоры Курасхан Ярикбаева мектебтинъ меканы аьли тап 1979-ншы йылда кулланувга берилгеннен бери сонда бир де капиталлык ярастырув ислери юритилмегенин белгиледи. Ол депутаттынъ алдында мектеб меканына сол себептен капиталлык ярастырув ислерин оьткеруьв соравды коьтерди. Султан Хамзаев бу сорав бойынша ол ДР Билимлендируьв эм илми министри Яхья Бучаев пен йолыгысып соьйлеегине сендирди.
РФ ат казанган маданият куллыкшысы, белгили ногай композиторы Яхья Кудайбердиев район орталыгында С.Батыров атындагы саниятлар мектебине янъы мекан курув кереги акында соравды коьтерди.
Депутат пан йолыгыста Терекли-Мектеб авыл ясуьйкенлер советининъ председатели Шатемир Мунгишиев эм район депутаты Рустам Адильгереев шыгып соьйледилер.
РФ Государстволык Думасынынъ депутаты Султан Хамзаев, Ногай районында ис визити мен болып, муннан согыс спецоперациясында ортакшылык этетаган бизим ердеслердинъ аьеллери мен йолыгысты. Онынъ акында билдиреди «Шоьл тавысы» республикалык газетасынынъ бас редакторы Эльмира Кожаева.
– Йолыгыста янъыларда Дагестан Аькимбасы Сергей Меликов «Яслардынъ патриотлык тербиялавына эткен косымы уьшин» деген медаль мен савгалаган СВО катнасувшысы эм афган согысынынъ ветераны Даниял Ильясов ортакшылык этти. Йолыгыс йылы аьллерде оьтти. Султан Хамзаев оьз увылларында патриотлык сезимин тербиялаган ата-аналарга оьз разылыгын билдирди, СВО катнасувшыларды колтыклав ман байланыста Госдумада кабыл этилинип алынатаган федераллык законлар акында хабарлады.
Украинада СВО оьтетаган еринде кедеси ортакшылык этетаган Амирхан Межитов депутатка Ногай районында СВО катнасувшыларынынъ Аталар комитети туьзилгени акында билдирди. А.Межитовтынъ соьзлери мен, аьскершилердинъ аталары да элимиздинъ кавыфсызлыгын канагатлав бойынша ямагат борышларды яшавга шыгарувда ортакшылык этпеге ниетлери бар. Султан Хамзаев бу баславды хош коьрди эм оьз коьмекшилерине Аталар комитети мен байланыс тутувды тапшырды. Йолыгыста, солай ок афган согысынынъ ветераны Даниял Ильясов он йыллардан артык заман бойы ога закон бойынша берилмеге керек турак-уьй сертификатын алалмайтаганы ман байланыслы маьселе коьтерилди. РФ Госдума депутаты бу соравды оьз тергеви астына алды. СВО катнасувшыларынынъ аналары Султан Хамзаевке олар ман йолыгысканы уьшин оьз разылыкларын билдирдилер эм ога законодательлик аьрекетинде уьстинликлер йорадылар.
Сонъ оьзининъ ТГ-каналында Султан Хамзаев: «Ногай районында СВО катнасувшылар аьеллери мен йолыгыстым. Олардынъ ата-аналары, кардаш-тувганлары РФ Президентининъ курсынынъ дурыслыгында эш бир шекленмейдилер. Коьбиси сол куьн, СВО-дынъ биринши куьнлериннен алып бир-бирисин колтыклайдылар, гуманитарлык югин йыядылар, яслардынъ патриотлык тербиялавына, туьрли категория аьдемлерге коьмек этуьвге каратылып аьрекет этетаган ямагат организациялардынъ район боьликлерин оьрлендируьв бойынша куллык юритедилер. Эки саьаттен заман узагында коьп затлар ортага салынып ойласылды. Баьри шакырувларга, бизим эр йигитлеримизди яклав ман байланыста айтылган кайбир ой-токтасларга маьне берилди. Сондай йылы аьллерде оьткен йолыгыстынъ баьри катнасувшыларына оьз разылыгымды билдиремен. Берк ден савлык, куьш-куватлык, шыдамлык сизге эм сизинъ ювыкларынъызга!» – деп билдирген.